Klimastraik

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen
Klimastraik z Zöri im 6. April 2019: „Schützed s‘Klima!“
A de Klimastraikdemo z Bern im 15. März 2019: „We d Schwiz bhouptet si sig neutral, wieso de nid klimaneutral?“
Klimastraik z Zöri im 6. April 2019: „Handlä! Ufä mit dä Klimaziel, abä mit äm CO2!“
Lausanne, 9. August 2019.

De Klimastraik, im Weltsche grève du climat[1] oder Grève du climat,[2] z Tütschland und in anderne Länder aber Fridays For Future („Frittig für d Zuekumpft“)[3] isch en internationaali Biwegig vo Jugedliche, bsundrig vo Schüeller und Schüellerine, aber o vo Studente und Studentine, wo sich deföör isetzid, as d Regierige vo de anzelne Länder endlich emole ernsthafti Schritt undernemed, demit d Klimaerwärmig iidämmt were cha.

Gschicht[ändere | Quälltäxt bearbeite]

Die weltwiiti Jugedbiwegig isch vo de schwedische Klimaschützeri Greta Thunberg uusgange. Si hett im Augste 2018 ufgrund vo der groose Hitz und ussergwöönliche Tröchni im Summer, am erste Schuelttagg noch de Feri vorem schwedische Riichstaag demonstriert, und het e Plakaat ghebt, wo ‘Skolstrejk för klimatet’ („Schuelstraik för s Klima“) druff gstanden isch. Drufabe hett si denn jede Frittig gstraikt und bald hend sich ere o anderi Schüeller aagschlosse. Mittlerwiile hend sich Jugedlichi i villne Stedt uf de ganze Welt zämetue und hend o afange för s Klima straike. I de Schwiiz isch de ersti Klimastraik am 14. Dezember 2018 z Zöri mit 300 Tailnemmer doregfüehrt wore.

Die Jugedliche verlanget debii, as di lokaale Regierige und Landesregierige de Klimanotstand uusrüefid und ernsthafti Schritt gege d Erderwärmig undernemid. Si wörffed a de ältere Generatione vor, ass si ene d Zuekumpft chlaue tüegid. De Basler Groossi Root hett am 20. Februar 2019 als ersts Schwiizer Parlament enere Resolution zum Klimanotstand zuegstomme.[4]

Am 15. Merz 2019, au en Frittig, hetts rond 1700 Kundgebige weltwiit gee. I de Schwiiz hebid a dem Tag rond 65'000 Mensche för d Umsetzig vom Pariser Klimaabkomme und d Usrüefig vom nationale Klimanotstand demonstriert.[5]

Kritik[ändere | Quälltäxt bearbeite]

De Klimastraik chunnt bi villne Lütt schlecht aa, vor alem bi asige, wo a de Mainig sind, as da mit de Erderwärmig gär nöd stimi. Vili nemed d Aaliige vo de „Chind“ nöd ernst und mainet, si tüeged nume drum straike, demit si e Grund zom Schuelschwenze hebid.[6] Si sölid besser i d Schuel goo und lerne d Zämehäng z verstoo. Hüüffig werd a de Jugedliche o vorgworffe, si lebid völig inkonsequent ud saiet di grössere Umweltverpester as di Erwachsnige, scho drom, well si ständig am Natel (Handy) hanged und mit em Flugi uf Maturarais flüügid.[7]

E paar Schuele hend adroot, as die Schüeller und Schüellerine, wo wegem Straik nöd i d Schuel chömid, mit disziplinaarische Maasnaame rechne müesid und as die, wo nöd ane Prüefig chömed, automaatisch en Ainer öberchömid.[8]

Weblink[ändere | Quälltäxt bearbeite]

 Commons: Klimastraik – Sammlig vo Multimediadateie
 Commons: Klimastraik i de Schwiiz – Sammlig vo Multimediadateie

Fuessnoote[ändere | Quälltäxt bearbeite]

  1. Les élèves vont sécher l´école pour le climat Artikel uf lematin.ch vom 17. Jänner 2019
  2. Grève du climat: 10 000 absents en classe… Et 5000 manifestants Artikel uf radiolac.ch vom 8. Februar 2019 schribt au im Flüüsstext «Grève du climat»
  3. Über uns – Fridays For Future uf fridaysforfuture.de abgruefen am 12. Februar 2019
  4. Basel-Stadt ruft den Klimanotstand aus, Artikel uf tagesanzeiger.ch vom 20. Februar 2019.
  5. Für das Klima auf die Strasse – auch in der Schweiz, Artikel uf srf.ch vom 15. Merz 2019.
  6. St. Galler Forscher zum Klimastreik: «Das ist mehr als Schulschwänzen» Artikel uf tagblatt.ch vom 25. Jänner 2019
  7. Die moralische Falle des «Klimastreiks» Artikel uf nzz.ch vom 2. Februar 2019
  8. Verpasste Prüfung: Klimastreik-Schüler erhalten in Waadt die Note 1 – in St.Gallen gibt's eine unentschuldigte Absenz Artikel uf tagblatt.ch vom 29. Jänner 2019