Kino Wilde Maa (Mänidorf)

Dialäkt: Züritüütsch

S Kino Wilde Maa z Mänidorf isch es Kino mit 71 Plätz z Mänidorf am Zürisee. S isch hüt s äinzige Kino am rächte Seeufer.

S Kino Wilde Ma häd vili Gsichter: vom Dunschtig bis am Samschtig zäigets di nöischte Film, am Mittwuch und am Suntig Studiofilm. Am Friitignomitag gits synchronisierti Film mit Kafi und Chueche. Für d Chind isch de Filmclub Zauberlatärne. Und im Spaatsumer gits es Filmfäscht.

Gschicht

Won am 8. Dezämber 1945 im grosse Saal vom Hotel Wilde Maa di gross Abigunderhaltig mit Musig vo de Harmonie und eme Theater verbii gsi isch, isch de Saal in es Kino umpoue worde. E breiti Stäge mit eme Gländer i de Mitti, isch in erschte Stock ufe, von e groosses hells Foyer gsi isch. Det isch au s Kassehüüsli gstande. Im Saal häts öppe 300 Plätz gha, vertäilt uf de Saal, d Eschtrade und de Balkon. I de 1970er-Jaar isch im Foyer e Videothek iigrichted worde. D Gwünn vo de Videothek händ s Kino am Läbe phalte.

Filmfründe händ 1983 en Understützigclub gründet, de Filmclub. Dä häd s Kino am Mäntig und am Ziischtig gmietet und Studioflm zäiget. Spööter häd d Gmäind en nöie Aastrich vo de Liinwand zalt. Won 1994 wäge enere Brandstiftig s Hotel Wilde Maa abeprunne isch, isch das schlimm gsi fürs Kino: da ganzi Saal verraucht und vom Löschwasser ales überschwämt.

D Gmäind häd d Ruine vom Wilde Ma verchauft. Vili Lüüt us em Dorf händ e Lösig fürs Kino gsuecht. Und die isch ase gsi: E Gnosseschaft füert s Kino im Rosstall vom Wilde Maa, won d Gmäind nöd verchauft gha häd. Im Dezämber 1995 häd Gmäindversamlig dadezue ja gsäit und am 7. Jänner 1998 isch de nöie Wildi Maa ufgange. A de Gmäindversamlig isch sogar en Brief vo de Metro Goldwyn Mayr vo Holywood verläse worde, won sich für s Kino iigsetzt häd. Sit em Jänner 2012 häd s Kino en digitale Projäkter.

Anderi Kino am See

S git no es Kino z Wädischwil uf de andere Seesiite (sit 1922) und di zwäi Kino z Rapperschwil. Früener häts am See aber no me Kino ge:

• S Cinema Ideal z Chüsnacht a de Züristrass 157, won am 28. Oktober 1949 vom Adolf Leeme gefüert worden isch und 1971 zuegangen isch. S Ideal häd 306 Plätz gha.
• S Kino Rex z Mäile, won 286 Plätz gha häd.
• Z Thalwil s Kino Speer mit 278 Plätz, 1950 bis 1978, won 2017 abproche worden isch.
• Z Horge s Kino Capitol mit 296 Plätz.
• Z Richterschwil s Kino Rex mit 288 Plätz, bis 1989.

I de Stadt häts am See es Kino z Wollishofe gee (s Morgetal, 1942-2002) und 1922-1989 eis z Riesbach, s Seefäld.

Weblink

• D Website vom Kino Wilde Maa z Mänidorf