Katja Wünsche

D Katja Wünsche (* 2. April 1981 z Dresden) isch e dytschi Ballett-Dänzeri. Vu 2012 bis 2023 het si as Erschti Solischti bim Ballett Züri gschafft.

Lääbe

D Katja Wünsche isch z Berlin ufgwagse un un het scho in ire Schuelzyt im Corps de ballet vu dr Staatsopere mitgwirkt. Z Berlin het si ab 1991 e Uusbildig an dr Staatlige Ballettschuel Berlin gmacht un die 1999 abgschlosse. Aafangs Spiilzyt 1999/2000 isch si Mitglid im Corps de ballet vum Stuegerter Ballett wore, in dr Spiilzyt 2002/03 Halbsolischti, 2003/04 Solischti un in dr Spiilzyt 2006/07 Erschti Solischti vum Ballett. Zur Saison 2012/13 isch si an s Ballett Züri gwägslet.

Zum Ändi vu dr Saison 2022/23 het d Wünsche ufghert mit ire Karriere as Dänzeri. Si studiert syt em Spotjohr 2023 an der Uniwersitet Züri im Studiegang Executive Master in Art Administration.

D Katja Wünsche isch ghyrote un Mueter vun eme Suhn.

Repertoire

Dr Katja Wünsche ire Repertoire vu wichtige Rolle in Handligsballett umfasst d Titelrolle in Romeo und Julia (John Cranko), La Sylphide (Peter Schaufuss, noch em August Bournonville) un Lulu. Eine Monstretragödie (Christian Spuck) un d Prinzässi Aurora in s Marcia Haydées Dornröschen (noch em Marius Petipa), d Olga in Onegin un d Katharina un d Bianca in Der Widerspenstigen Zähmung (boodi: John Cranko), d Stella in Endstation Sehnsucht un Manon Lescaut un d Prudence in Die Kameliendame (boodi: John Neumeier), d Columbina in Pierrot Lunaire (Glen Tetley) un d Myrtha, d Chenigi vu dr Wilis in Giselle (no Reid Anderson un Valentina Savina). Anderi wichtig Rolle het si in Schwanensee (John Cranko) un in Don Quichotte (Maximiliano Guerra) danzt.

Uuszaichnige

• 1997/98: Prix de Lausanne (3. Bryys 1997, 2. Bryys 1998)
• 1999: Grand Prix d’Eurovision fir jungi Dänzer (1. Bryys fir e Pas de deux)
• 2007: Dytsche Danzbryys „Zukunft“
• 2007: Dytsche Theaterbryys „Der Faust“ (Beschti darstellerischi Laischtig im Danz)
• 2014: Danzbryys vu dr Frynd vum Ballett Züri

Fueßnote

Dä Artikel basiert uff ere fräie Übersetzig vu dere Version vum Artikel „Katja_Wünsche“ vu de dütsche Wikipedia. E Liste vu de Autore un Versione isch do z finde.