Katarina Barley

Us der alemannische Wikipedia, der freie Dialäkt-Enzyklopedy
Hops zue: Navigation, Suech
d Katarina Barley (2014)
Video-Vorstellig (2014)

D Katarina Barley (* 19. Novämber 1968 z Köln) isch e dytschi Jurischti, Bolitikeri (SPD) un Abgordneti im 18. Dytsche Bundesdag. Syt Jänner 2016 isch si Generalsekretäri vu SPD.

Läbe[ändere | Quälltäxt bearbeite]

D Barley isch as Dochter vum e britische Radioredakteur un ere dytsche Dokteri uf d Wält chuu. Anne 1987 het si am Gymnasium Rodenkirchen z Köln s Abitur gmacht. Derno het si an dr Philipps-Universitet Marburg Rächtswisseschafte studiert un e Uusduschstudium an dr Universitet Paris-Sid absolviert, wu si 1990 mit em „Diplôme de droit français“ (Diplom vum Franzesische Rächt) abgschlosse het.[1] Im Johr 1993 het si bim Bodo Pieroth an dr Universitet Münster e Promotion aagfange, wu si 1998 abgschlosse het.

Noch em Studium het si zerscht as Rächtsaawältin fir Medizinrächt in ere Hamburger Großchanzlei gschafft, voreb si in dr Wisseschaftli Dienscht vum Landdag vu Rhyland-Pfalz gwächslet isch.[2] Derno isch si wisseschaftligi Mitarbaiteri im Bundesverfassigsgricht b dr Renate Jaeger gsii, speter Richteri am Landgricht Trier un am Amtsgericht Wittlich. Ab 2008 bis zue ihre Wahl in dr Bundesdag isch si Referänti im Minischterium vu dr Juschtiz un fir Verbruucherschutz z Mainz gsii. Syt 2010 isch d Barley Mitglid im Landesbeamtebyrot vu ver.di.

D Barley isch ghyrote un het zwai Chinder.

Bolitik[ändere | Quälltäxt bearbeite]

Anne 1994 isch d Barley Mitglid vu dr SPD wore. Syt 2005 isch si Mitgild im Chraisvorstand vu dr SPD Trier-Saarburg, syt 2010 Vorsitzeri.[3] Bi dr Bundesdagswahl 2013 isch si Diräktkandidati im Bundesdagswahlchrais Trier gsii un isch uf 31,1 Brozänt vu dr Erschtstimme chuu.[4] Iber Blatz 7 vu dr Landeslischt isch si in dr Bundesdag yyzoge.[5]

As Juschtiziari vu dr SPD-Bundesdagsfraktion isch d Barley Mitglid im gschäftsfierende Vorstand vu dr Fraktion. Im Bundesdag ghert si as ordeli Mitglid däne Uusschiss un Gremien aa:

  • Uusschuss fir d Aaglägehaite vu dr Europäische Union
  • Uusschuss fir Wahlbriefig, Immunitet un Gschäftsornig
  • Elteschterot
  • Bundesrichterwahluusschuss
  • Bundesverfassigsrichterwahluusschuss

Derzue isch si stellverdrättend Mitglid im Rächtsuusschuss.

Im Novämber 2015 isch d Barley as Generalsekretäri vu dr SPD vorgschlaa wore. Am 11. Dezämber 2015 isch si uf em SPD-Bundesbarteidag zur Generalsekretäri gwehlt wore un het s Amt im Jänner 2016 aadrätte.

Schrifte (Uuswahl)[ändere | Quälltäxt bearbeite]

  • Das Kommunalwahlrecht für Ausländer nach der Neuordnung des Art. 28 Abs. 1 S. 3 GG. (= Dissertation, Universität Münster 1997) in: Schriften zum europäischen Recht. Band 55. Duncker & Humblot, Berlin 1999, ISBN 3-428-09410-7.

Weblink[ändere | Quälltäxt bearbeite]

 Commons: Katarina Barley – Sammlig vo Multimediadateie

Fueßnote[ändere | Quälltäxt bearbeite]

  1. Katarina privat uf katarina-barley.de, abgruefen am 25. Septämber 2013.
  2. Katarina Barley bi Wolters Kluwer.
  3. Chraisvorstand vu dr SPD Trier-Saarburg
  4. Wahlkreisergebnis Bundesland Rheinland-Pfalz Wahlkreis 204 - Trier, abgrufen am 26. Septämber 2013
  5. Gewählte Landeslistenbewerber: Rheinland-Pfalz, abgruefen am 26. Septämber 2013
Information icon.svg Dä Artikel basiert uff ere fräie Übersetzig vu dere Version vum Artikel „Katarina_Barley“ vu de dütsche Wikipedia.

E Liste vu de Autore un Versione isch do z finde.