Karl Rösch
Dr Karl Rösch (* 6. Augschte 1912 z Winterschwyler; † 25. Februar 2001 z Löörech) isch e dytsche Buur, Chinschtler un Dichter gsii.
Lääbe
[ändere | Quälltäxt bearbeite]Dr Rösch isch z Winterschwyler as Suhn vun eme Sattlermaischter uf d Wält chuu.
Mit elf Johr het er bi archäologische Uusgrabige dr Mooler Hermann Daur vu Ötlige chänneglehrt. Däm het er bim Moole iber d Achsle gluegt, Scho frie isch sy chinschtlerisch Talänt uusechuu, Mit 13 Johr het er e Blaan vum Baan vu syre Haimetgmai zaichnet un scho mit 16 Johr het er sy erscht Bild verchauft. No dr Schuel het er aber uf Dränge vu syne Eltere erscht emol z Löörech e Lehr gmacht as Sattler, ass er speter dr Bedrib vum Vater het chenne ibernee.
Im Chrieg isch dr Karl Rösch as Soldat z Russland gsii un in Gfangeschaft chuu. Sy Mooltalänt het em ghulfe z iberläbe, mit Zaichnige, wun er mit Chole gmacht het. Anne 1949 isch er retuur chuu vu Sibirie.
Im Februar 1950 het er sy Verlobti, d Liesel Koger, ghyrote, d Dochter vum Ötliger Burgermaischter, wun er scho vor em Chrieg chänneglehrt ghaa het. Si sin zäme in s Huus vu dr Schwiigereltere z Ötlige zoge un hän dr Buurehoof ibernuu.
Mer chännt en im Markgreflerland as Landschaftsmooler. Är het vyl in samfte Paschtellteen gmoolt, Hauptmotiv vy syre Chunscht isch aber nit nume sy Haimet gsii, nai, är het au syni Chriegserfahrige ufgschafft in Bilder un het d Gfohr fir d Wält dur Atomwaffe un Umwältverwieschtig thematisiert. Vor allem in dr 1970er Johr sin eso expressionistischeri Wärch mit apokalyptische Ziig entstande.
Är het au gschriibe, unter anderem Gedicht uf Alemannisch. Gedicht un Gschichte vun em sin in dr Anthology Usezupfts usem Alemannische (1983) un spter in sym Biechli Zwüsche gestern un morn uusechuu.
Dernäbe isch dr Rösch vyl Johr im Gmairot vu Ölingen gsii un au Mitglid im Gsangverain, wun er Zweete Vorsitzer gsii isch.
Anne 1988 isch sy Frau gstorbe. Är sälber het d Tuberkulose iberwunde un het 25 lang mit Chählchopfchräbs gläbt, het am Änd nume no chenne flischtere. Bis ins hoch Alter het er no gmoolt un gschribe un uf em Buurehof mitghulfe. Syni letschte Bilder sin e baar Wuche vor sym Dood entstande. Am 25. Februar 2001 isch er im Alter vu 88 Johr gstorbe,
Im Johr 2009 isch im Roothuus z Winterschwyler unter em Titel „Karl Rösch Retrospektive“ ne Uusstellig mit Wärch vum Rösch ziagt wore. Zue sym 100. Geburtsdag 2012 het s Ötlinger Museum „Dorfstube“ ne Uustellig mit Wäärch vun em zaigt.
Literatur
[ändere | Quälltäxt bearbeite]- Autoren aus dem Dreiländereck. In: Alemannisch dunkt üs guet I/II 2000, S. 44–45
Weblink
[ändere | Quälltäxt bearbeite]- Rösch, Karl uf LEO-BW
- Einfühlsame Kämpfernatur, Badischi Zytig, 11. Septämber 2012
- Er wollte, dass sich jeder ein Bild von ihm leisten konnte, Badischi Zytig, 6. Augschte 2012
- Ein Gemarkungsplan war sein erstes "Kunstwerk, Badischi Zytig, 25. Merz 2009