Jugedhaim Prêles
S Jugedhaim Prêles isch es Erzüchigshaim gsi, wo verhaltesuffällegi, normalbegabti jungi Manne im Alter bis zu 22 Johr betreut hät. Es isch uf em Gebiet vo de ehmolige Schwizer Gmaind Prêles im Bärner Jura betribe worde.
Di verschidene Geböi stönd e chli usserhalb vom Dorf uf 811 m ü. M., am en Ort, wo Châtillon haisst, zmitzt i de Hochebeni vom Tessebärg. S Jugedhaim isch zweisprochig gfüert wore, hät 70 Plätz för männlechi Jugendlechi zwüsche 15 und 22 Johr gha, wo us de ganze Schwiz döt iigwise wore sind. De ganz Betriib hät 120 Vollzitstelle gha (Stand Juni 2016).[1]
Gschicht
[ändere | Quälltäxt bearbeite]Im März 1920 isch z Prêles d Zwangserzüchigsaastalt Tessebärg gründet worde und 1945 in Erzüchigsaastalt umgnännt worde. Zwüsche 1958 und 1960 isch mit em Zöglingshuus und Wohnhüser för di Aagstellte de erschti grösseri Uusbau gmacht worde. Vo 1979 bis 1981 isch de zwaiti grossi Uusbau; mit witere Ateliers, eme Gwächshuus, eme Halleschwimmbad und Raienaifamiliehüser för s Personal. Ab 1990 isch s Jugedhaim Prêles es Justizhaim gsi, wo vom Bund anerchännt gsi isch.[1]
Im Februar 2008 hät d Polizei im Jugedhaim ermittled. Es söll e Betreueri zwee Insasse Gäld för Sex aapote ha.[2]
I de Johr 2010 bis 2012 isch s Jugedhaim zum dritte Mol umbaut worde. De Umbau hät 38 Millione Franke koschted.[3] Es isch umfassend saniert und de neue pädagogische Bedürfniss und Sicherhaitsnorme aapasst worde.[1] Wills schwirig gsi isch, diplomierti Sozialpädagoge z finde, hät di dritti gschlosseni Wohngruppe im November 2013 immer no nöd chöne eröffnet wärde.[4]
Aafangs Februar 2016 isch bekannt worde, as das Jugedhaim us verschidnige Gründ uf Endi Johr zuegoo söll und nochhär as Uusschaffigsgfängnis söll diene.[3] Es isch dänn uf de 31. Oktober 2016 gschlosse wore.[5]
Weblink
[ändere | Quälltäxt bearbeite]- Jugendheim Prêles, Portrait uf de Website vom Kanton Bärn (Memento vom 22. Oktober 2013 im Internet Archive)
Fuessnoote
[ändere | Quälltäxt bearbeite]- ↑ 1,0 1,1 1,2 Kurzporträt Jugendheim Prêles (JHP) (Site cha nüme abgrüeft wärde; Suche im Webarchiv) PDF-Datei uf de Website vom Kanton Bärn, abgruefen am 8. Juni 2016
- ↑ Sex-Vorwürfe gegen Betreuerin von Jugendheim in Prêles NZZ, Artikel vom 1. Februar 2008
- ↑ 3,0 3,1 Jugendheim wird zum Ausschaffungs-Gefängnis20 Minute, Artikel vom 4. Februar 2016
- ↑ Gesucht: Fachkräfte fürs Jugendheim Prêles Schwizer Färnsee, Sändig Schwiz aktuell vom 15. November 2013
- ↑ Jugendheim Prêles, Mittailig uf de Website vom Kanton Bärn. Archiviert vom Original am 3. Februar 2017; abgruefen am 29. Juni 2017.