John Auguste Clerc

Us der alemannische Wikipedia, der freie Dialäkt-Enzyklopedy
John Clerc

Dr John Auguste Clerc (* 22. Jänner 1857; † 9. Oktober 1898 z Nöieburg) isch e Schwiizer Lehrer und Politiker gsi.

Dr Clerc isch z Düütschland Lehrer worde und het denn z Saint-Imier und drno am Collège latin und dänn a dr Kantonsschuel z Nöieburg gschaffet. Er isch scho früe für die radikaali Partei Grossroot vom Kanton Nöieburg gsi. Ane 1886 het men en als Nünezwänzgjöörige als Nochfolger vom Albert-Louis Roulet i Regierigsroot gwäält. Er het s Bildigs- und Kultusdepartemänt übernoo. 1890 und 1896 isch er dr Nöieburger Regierigspresidänt gsi.

Dr John Clerc het als modärne Pädagoog vill too für d Reform vom Nöieburger Schuelwääse, für d Nöiorganisazioon vo de Schuelhüüser und für divärsi Bildigsagebott, so wie öpe de nöie Schuelchuchine, won är het lo yrichte. Und er het drfüür gluegt, ass früschi Schuelbüecher usecho sind.

1889 het dr Clerc d Idee von ere kantonalen akademische Kulturgselschaft uufprocht und isch au grad dere iren eerscht Presidänt woorde.[1][2] 1893 isch dr Nöieburger als schwiizerische Bundesdelegierte für d Wältauusstellig vo Chicago uusgwäält woorde. Und er isch au als Schriftsteller uufträtte und het, meischtens under verschidene Psöidonym, für die kantonale Zytige Sache gschribe.

Ane 1898 het dr John Clerc i synere Funkzioon als Bildigsdiräkter em Romanischt Louis Gauchat ghulfe, vo de Wälschschwiizer Kantöön s Gält für s Wörterbuechprojäkt vom Glossaire des patois de la Suisse romande z übercho; und er isch dänn au grad dr eerscht Presidänt vo däm Wäärch synere Verwaltigskommissioon gsi.

Dr Clerc isch ane 1898 als junge Regierigsroot im Amt gstoorbe.

Wäärch[ändere | Quälltäxt bearbeite]

  • Marguerite. Nouvelle historique, 1876.

Literatur[ändere | Quälltäxt bearbeite]

  • L’Impartial, 1. Oktober 1898, S. 2.

Fuessnoote[ändere | Quälltäxt bearbeite]

  1. Société des alumni. Dimplômés et amis de l’université de Neuchâtel uf unine.ch
  2. Centenaire de la Société académique neuchâteloise. In: Université Neuchâtel Informations, April 1990.