Johann Jacob Burckhardt

Dialäkt: Baseldütsch

Dr Johann Jacob Buurged (* 19. Mai 1614 z Basel; † 1. Novämber 1690 au dört) isch e Baasler Politiker us em Daig gsi, wo vo de 1630er Joor bis zu sim Dood die mäiste vo de wichdige Baasler Ämter iignoo het und vo 1684 bis 1690 Bürgermäister gsi isch.

Lääbe und Karriere

Dr Buurged isch am 19. Mai 1614 z Baasel uf d Wält cho. Sini Eltere si dr Oberstzunftmeister und Brofässer für Ethik Johann Rudolf Buurged und d Esther Battier. gsi. Er het an dr Uni Baael Rächt afo studiere und denn z Gämf und z Frankriich. Er isch denn uf Baasel zruggchoo und isch 1633 Schriiber uf dr Baasler Kanzlei worde. 1636 het er d Catharina Iseli, d Dochder vom Rootsheer Lucas Iseli ghürootet 1638 isch er zum Verwalter vom Kiirche- und Klosterguet uf em Münsterbärg ernennt worde. Vo 1646 isch er Säggser vo dr Zumft zu Huusgnosse gsi. Vo 1657 isch er im Chläine Root gsässe und vo 1659 bis 1690 as Drizääner gregiert. 1666 isch er zum Landvogt z Chläihüünige ernennt worde. Vo 1666 bis 1684 isch er Oberstzumftmäister und Dreier gsi und im Joor druf isch er Kaufhuusher worde. Er het au uf dr Eebeni vo dr Äidgenosseschft politisiert. Er isch e baar Mol Abgeordnet an dr Daagsatzig gsi. 1673 und 1681 het en d Daagsatzig as äine vo iire Gsandte zum Empfang vom franzöösiche Köönig Louis XIV gschiggt worde. 1683 isch er zum Vermiddler im Glarner Religionsstrit ernennt worde.

1684 isch dr Buurged Bürgermäister worde, in ere Zit, wo die politischi Macht in dr Stadt am sterggste in nume weenige Händ konzentriert gsi isch. D Familie vom Daig si nid nume in de Heerezümft voorherschend gsi, sondern häi au Handwärkerzümft afo übernee. 1690 het sich dr Groossroot gege die fast absoluti Vorherschaft vom Chläine Root ufgleent und d Macht an sich grisse.

Dr Johann Jacob Buurged isch am 1. Novämber 1690 z Baasel gstorbe.

Dä Artikel basiert uff ere fräie Übersetzig vum Artikel „Johann Jacob Burckhardt“ vu de dütsche Wikipedia. E Liste vu de Autore un Versione isch Jacob Burckhardt&action=history do z finde.