Jakob Wirz

Familiegrab Wirz / Chillhof Gälterchinde nördlich vo dr Chille. / Verglych d Geburts- und Schtärbedate uf Grabschtei und Kantonslexikon im extärne Verwys!

Dr Jakob Wirz (* 12. Meie 1856 z Gälterchinde; † 23. Meie 1904 z Moskau) isch e Schwyzer Fabrikant gsi. Är isch reformiert und Bürger vo Gälterchinde gsi.

Sys Läbe

Dr Jakob Wirz isch dr Soon vom Leerer Johann Wirz und vo dr Salome Gerster gsi. Är het z Gälterchinde d Primarschuel und z Böckte d Bezirksschuel bsuecht und 1886 d Louise Esther Nidecker vo Basel ghürotet. Yre Soon isch dr berüemti Etnolog Paul Wirz gsi.

Sy Bruef

Dr Jakob Wirz het Bandwäber gleert. Drno het är sich in Kürs bim Verein vo de junge Chauflüt z Basel chaufmännisch lo usbilde. Är het sich in dr Sydenbandwäberei wyterbildet. Wärend dr Wirtschaftskrise, im Joor 1878, isch är nach Moskau usgwanderet und het dört im Betryb, wo im Heinrich Handschin ghört het, e Schtell als Wäbermeischter aagno. Är isch brueflig ufgschtyge und het s 1882 bis zum Gschäftsfüerer brocht.

Eini vo de Glogge us em Gälterchinder Chilleturm

Unternämer

Wo sich dr Heinrich Handschin us Russland zruggzoge het, het är ym si Firma zum ene höchschtprofitable Grossunternäme gmacht. Ab 1885 isch är Teilhaber vo dr Firma worde. Jetz het d Firma Handschin & Wirz gheisse und isch, wo dr erscht Wältchrieg aagfange het, die gröschti Bandwäberei vo Russland gsi. Är isch bis zu sym Läbensändi z Moskau blybe. Sys Grab isch uf em Chillhof Gälterchinde.

Syner Heimatgmein Gälterchinde het är es Waisehuus und Chilleglogge gschtiftet.

Literatur

• Winter P.: Jakob Wirz-Nidecker, Hektographie 1962.
• Schuppli R.: In oriente lux?, 1993, 47-51.
• Haener Ruth: Heinrich Handschin und seine Stiftung, 1994, 26-38

Weblink

• Dr Jakob Wirz im Persone Lexikon vom Kanton Basel Landschaft (D Geburts- und Schtärbedate in dem Lexikon und uf em Grabschtei schtimme nit uf e Tag übery!