Köbi Kuhn

Köbi Kuhn
Kuhn (2006)
Personalia
Name	Jakob Kuhn
Wänn uf d Wält choo	12. Oktober 1943
Wo uf d Wält choo	Züri-Wiedike, Schwyz
Wänn gstorbe	26. Novämber 2019
Wo gstorbe	Zollikerberg, Schwyz
Größi	175 cm
Position	Mittelfäld
Herre
Johr	Station	Spil (Tor)1
1960–1977	FC Züri
Nationalmannschaft
Johr	Uuswahl	Spil (Tor)
1962–1976	Schwyz	63 (5)
Statione als Trainer
Johr	Station
1983	FC Züri
1983–1984	FC Züri
1995–2001	Schwyz U-21
2001–2008	Schwyz
1 Aagää sind nur Ligaspiil.

Dr Jakob «Köbi» Kuhn (* 12. Oktober 1943 z Züri-Wiedike; † 26. Novämber 2019 z Zollikerberg, Gmai Zolike) isch e Schwyzer Fueßballspiiler un –trainer gsii. Är isch vu 2001 bis 2008 Trainer vu dr Schwyzer Fueßballnazionaalmannschaft gsii.

Spiilerkarriere

dr Köbi Kuhn as Spiiler vum FCZ (1963)

As Sibzeejeerige sch er vum Edi Nägeli, em Bresidänt vum FC Züri, entdeckt un fir di eerscht Mannschaft verbfliichtet woore. Är het 125 Franke Moonetsloon iberchuu as Spiiler, 40 Franke fir e jeede Siig, un fimf Franke fir e jeeds bsuecht Training.

In syre ganze Karriere as aktiive Fueßballer het dr Kuhn bim FC Züri im Mittelfäld gspiilt, abgsääne vun eme zweemooenetige Abstächer zum Stadtrivaal Grasshoppers Club. Är het vu 1962 bis 1977 segsmool d Schwyzer Maischterrschaft un fimfmool dr Schwyzer Cup gwunne. Fir d Nazionaalmannschaft het er 63 Länderspiil absolviert.

Syni grooß Dreiji zum FC Züri het e internazionaali Karriere verhinderet, wäge däm het mer en as Spiiler nume in dr Schwyz gchännt. D Nazionaalmannschaft het si mit em Kuhn zwaimool fir d WM (1962 z Chile un 1966 z Ängland) chenne qualifiziere, het aber baidi Mool alli Spiil verloore.

Dr Kuhn isch 1966 bi dr 0:5-Niiderlaag geege Dytschland (1. Gruppespiil) zäme mit eme andere Laischtigsdreeger vu dr Mannschaft, em Werner Leimgruber, nit derby gsii wel er wäge Iberdrätte vum «Zapfestraich» vor em Spiil vum Trainer Alfredo Foni as Stroof nit ufgstellt wooren isch. Mit em FC Züri isch er am Aafang un nomool am Änd vu syre Karriere bis in s Halbfinaal vum Europapokaal vu dr Landesmaischter chuu (1964, uusgschiide geg Real Madrid, un 1977, uusgschiide geg dr FC Liverpool).

Trainerkarriere

dr Köbi Kuhn im Trainingslaager vu dr Schwyzer Nazionaalmannschaft vor dr Euro 08

Voreb er zum Nazionaaltrainer gruefe wooren isch, het er erfolgryych as Noowugstrainer bim FCZ un speeter bi dr U21-Nazionaalmannschaft gschafft. Är het in dr letschte Joor vyyl jungi Spiiler nominiert un isch au nit dervoor zruggschreckt, si vu arrivierte Spiiler z dränne, wu die Harmony villicht gfäärdet hätte (wie dr Ciriaco Sforza). Är het au alsfuurt junge Spiiler wie em Tranquillo Barnetta, em Valon Behrami, em Philippe Senderos s Verdröue gschänkt, wu iim des mit guete Laischtige dankt hän.

Syter anne 2001 im Traineramt fir s sognännt A-Team, isch dr Kuhn an sy eerrscht Zyyl chuu: As Gruppesiiger het si d Mannschaft fir d EM 2004 z Portugal qualifiziert, wu si in dr Gruppefaas no zwoo Niiderlaage (geg Frankryych un Ängland) un eme Unentschiide (gege Kroazie) uf em letschte Blatz glandet isch. Dur zwai Entschaidigsspiil geege d Dirkei (2:0 z Bäärn; 2:4 z Istanbul) het er im Novämber 2005 s Team zue dr WM 2006 z Dytschland gfiert, wu s bis ins Achtelfinaal chuu isch. As Eerig isch am 19. Novämber 2005 mit Gnäämigung vu dr Stadt Züri z Wiedike, dr Haimet vum Köbi Kuhn, dr nit-offiziäll «Köbi-Kuhn-Platz WM 2006» yygweit woore. Im Oktoober 2006 het dr Kuhn aagchindet, ass er no dr EM 2008 as Nazionaaltrainer zrugdritt. Am 17. Dezämber 2006 isch er zum Schwyzer Trainer vum Joor gweelt woore, am 13. Jänner 2007 zum Schwyzer vum Joor.

Am 15. Juni 2008 het er sy letscht Spiil as Trainer vu dr Nazionaalmannschaft ghaa. D Schwyz het s letscht Voorrundespiil geg Portugal mit 2:0 gwunne. Noch em Abbfiff isch dr Trainer mit eme Transparänt vu dr Mannschaft mit dr Ufschriift «Merci Köbi» un Gsäng vu dr Fään «Köbi National» gfyyrt woore. Des het drott ass d Schwyzer Nazionaalmannschaft uusgschiiden isch, zue me emozionaale Änd vu dr EM 2008 fir dr Gaschtgeeber gfiert. Noofolger vum Kuhn isch dr Ottmar Hitzfeld woore.

Privaatlääbe

Dr Jakob Kuhn isch in ere siibechepfige Familie ufgwagse. Mit sym Vater, eme Schryyner, het er vylm Spiil im Hardturm un im Letzigrund bsuecht. Scho ase chlai isch er begaischteret gsii vum Fueßball un het dr Ferenc Puskás bewunderet, dr ungarisch Stiirmer vu dr 1950er Joor.

Fir d SVP het er fir s Barlemänt vu d Stadt Züri un speeter fir Barlemänt vum Kanton Züri kandidiert. Nume weenig Stimme hän em fir s letscht Amt gfäält. Mit eme finanziälle Engaschmänt, dr „Köbi Kuhn Versicherungen“, het er iiber ai Millioon Franke verloore. Anne 1987 isch iber iim dr Konkurs ufgmacht woore.

Sy Frau Alice, wun er anne 1965 ghyroote ghaa het, het e as Manageri un Berooteri unterstitzt. Si isch anne 2014 noch eme Hiirnschlaag gstoorbe. Sy Doochter Viviane isch vier Joor speeter gstoorbe, mit 46 Joor, an dr Folge vun ere psychische Chranket un ere Drogenabhängigkait. Sy Mueter isch 103 Joor alt woore.

Anne 2013 isch bim Kuhn e chroonischi lymphatischi Leukämy feschtgstellt woore. Anne 2019 isch dr Kuhn uf dr Intensivstazioon vum Zürcher Triemlispitaal wäg ere Lungechranket un ere Bluetvergiftig bhandlet woore. Am 26. Novämber isch er im Alter vu 76 Joor im Spitaal Zollikerbärg gstoorbe.

Literatur

• Peter Birrer, Albert Staudenmann: Köbi Kuhn. Eine Hommage der Schweizer Fussball-Nationalmannschaft an ihren Trainer. Wörterseh Verlag, Gockhausen 2006, ISBN 978-3-033-00689-8.
• Ulrich Kuhn-Hellmessen (Hg.): Europameisterschaft 2004. Die Helden von Portugal. Mit Tagebuch von Köbi Kuhn. Sportverlag Europa Medien, Zürich 2004.
• Jakob Kuhn im Munzinger-Archiv (Artikelaafang frei abruefbar)

Weblink

 Commons: Jakob Kuhn – Sammlig vo Multimediadateie

• Statischtik FC Züri
• Köbi Kuhn bi swissinfo

Fueßnote

Dä Artikel basiert uff ere fräie Übersetzig vu dere Version vum Artikel „Köbi_Kuhn“ vu de dütsche Wikipedia. E Liste vu de Autore un Versione isch do z finde.