ISKCON (Hare Krishna) i de Schwiiz

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen
de Hare Krishna-Tempel a de Bergstrooss Zöri

D ISKCON (Internationali Gsellschaft för Krishna-Biwusstsii), besser bikannt as Hare Krishna, het au i de Schwiiz Aahänger, wo sich i meriri chlinneri Gruppierige glideret.

ISKCON[ändere | Quälltäxt bearbeite]

D ISKCON (“International Society for Krishna Consciousness”) isch 1966 vom indische Mönch A.C. Bhaktivedanta Prabhupada (1896-1977) z Amerika is Lebe grueffe wore. S Ziil vo dere religiöse Gruppierig, wo uf en alti Tradition vom Hinduismus zruggoot, isch d Verbraitig vo de Lehr vo de Bhagavadgita und d Vereerig vom Krishna . S Chernstuck vo de spirituelle Praxis isch de Bhakti Yoga, wo vom Prabhupada as »higebigsvolle Tienst« interpretiert werd. D ISKCON setzt sich au starch för de Vegetarismus ii. I de 1970er hend sich d Hare Krishna z Europa verbraitet.

Hare Krishna i de Schwiiz[ändere | Quälltäxt bearbeite]

Aafäng[ändere | Quälltäxt bearbeite]

Di erste Hare Krishna i de Schwiiz sind Mönch usem französische Grenoble gsii, wo z Gempf und z Losann ane 1971 afange hend missioniere. Scho 1972 isch de erst Krishna-Tempel z Petit-Lancy, emene Vorort vo Gempf, uuftue wore.

En Uufschwung het di chliini Schwiizer Hare Krishna-Gmaind ghaa, wo ane 1974 der Prabhupada selber uf Gempf choo isch und vom Gempfer Börgermaister M. Gilbert Duboule ofiziell empfange woren isch. De Prabhupada het dozmol au e Vortrag bi de UNO ghalte. S Presseecho isch riisig gsii und Tagespress und s Fernsee hend ase d Hare Krishna anere braite Öffetlichkait bikannt gmacht. De Hare-Krishna Tempel z Petit-Lancy het e grösseri Spend öbercho und isch drufabe ane 1975 is Châteaux Banquet zoge, emene Schlössli z Gempf. Doch scho noch zwai Joor isch de Tempel gschlosse wore.

Im gliiche Joor isch z Zöri a de Rotwandstroos s erst Krishnazentrum vo de Tütschschwiiz uufggange.

1977 hend d Hare Krishna z Didinge im Kantoo Friburg e chliine Buurehof pachtet, demit si aigni biologischi Produkt züche chöned.

S erst Ratha-yatra-Wagefest isch 1978 a de Gempfer Seeprominaade döregfüert wore und 1979 isch es a de Zörcher Baahofstrooss und ufem Fraumünsterplatz gfiiret wore. Im gliiche Joor isch z Zöri a de Brandschenkistroos de erst Govinda Treffpunkt uufgange.

1980er Joor[ändere | Quälltäxt bearbeite]

Im Früelig 1980 het d Schwiizer Krishna-Gsellschaft en alti baufälligi Villa am Züriberg gchauft und renoviert. So isch de Hare Krishna-Tempel Züri is Lebe grueffe wore und d Hare Krishna i de Schwiz hend dodemit e wichtigs Zentrum öberchoo.

Well de Buurhoof z Didinge z chlii woren isch för d Aasprüch vo de Hare Krishna, isch 1984 de gröösseri Hoof »La Pampa« z Sessa im tessiner Malcantone bizoge wore. Aber au de Buurehoof isch z chlii wore und 1989 isch de Betriib uf Roche d´Or im Jura umzoge.

Im Summer 1986 isch i de Schwiiz z erstmol d Krishna-Janmastami-Fiir öffetlich zelebriert wore. Debi het de domooligi indischi Botschafter Ashok Sen Chib en Aasprooch ghalte, won er bitont het, as d Krishna-Lehr kai Sekte sondern Bistandtail vom Hinduismus isch.

Wegem Börgerchrieg uf Sri Lanka sind i de 1980er immer mee Tamile i d Schwiiz cho. Dör si het de Hare Krishna-Tempel z Zöri schwiizwiit a Bidüttig gwune.

De Govinda Kulturtreff z Zöri isch ane 1986 a de Preyergass im Niderdorf uufgange und het rund 20 Joor Büecher, ayurvedischi Produkt verchauft und au vegetarischi Gricht serviert.

1990er Joor[ändere | Quälltäxt bearbeite]

I de 1990er Joor sind a verschidene Ort, so z Biel, z Basel und z Bern, aber au a chlinnere Orte noiji Treffpünkt und Hare-Krishne Tempel uufggane, vili hend aber nöd lang exisitert. De Buurehoof im Jura isch 1993 vo Roche d´Or is französische Dorf Châtenois zoge und het dai s Schloss Château Bellevue bizoge, well de Bode z Frankriich günstiger isch.

Noizitt[ändere | Quälltäxt bearbeite]

I de letschte Joor het sich s Uuftrete vo de ISKCON weltwiit gänderet. Sind früener no Mönche aktiv vo Tör zu Tör gwanderet und hend d Bhagavadgita verchauft oder i Fuessgängerzone vegetarischi Süessigkaite vertailt, so sind si hüt usem öffetliche Strossebild ener verschwunde. Chlinneri Zentre sind zueggange und de Hare Krishna-Tempel z Zöri het zittewiis finanzielli Engpäss öbercho.

Literatur[ändere | Quälltäxt bearbeite]

  • 100 Jahre Prabhupada - 25 Jahre Krishna-Bewusstsein in der Schweiz, Jubliäumsschrift der Schwezierischen Stiftung für Krishna-Bewusstsein, Zürich.

Link[ändere | Quälltäxt bearbeite]