Heinrich IV. vu Bade-Hachberg
| Dialäkt: Undermarkgreflerisch |
Dr Markgrof Heinrich IV. vu Bade-Hachberg († noch em 8. Novämber 1369) isch vu 1330 bis 1369 regierede Markgrof vu Hachberg un Landgrof vum Bryysgau gsi.
Läbe
[ändere | Quälltäxt bearbeite]Dr Heinrich IV. isch e Suhn vum Markgrof Heinrich III. vu Bade-Hachberg un dr Agnes vu Hohenberg gsi.
Wu syy Schwigervater, dr Burkhard vu Üsenberg 1336 gstorben isch, het er syyne zwee uumindige Sihn Johann un Hesso e großi Schuldelascht hinterloo. Dr Heinrich IV., dr Vormund vu däne bede, het derno d Bsitzige an d Stedt Fryybeg un Ändinge verpfändet. Anne 1352 het dr Friedrich von Üsenberg († 1354) wäge däne hoche Schulde d Stadt Känzinge schließli fir 2440 Mark Silber an dr Heinrich IV. verchauft mitsamt dr Herrschaft Kirnburg. Dr Heinrich het d Rächt vu dr Stadt anerchännt, nit aber d Läächeshoheit vu dr Eschtryycher, wu scho syt 1298 bstande isch. Zwei Johr speter isch d Känzinger Linie vu dr Üsenberg uusgstorbe un Känzinge isch derno ganz in dr Bsitz v dr Merkgrofe vu Hachberg ibergange. Wel dr Heinrich s Lääche vum Rudolf vu Eeschtryych nit het welle akzäptiere, het s e Fehde gee wzische ihm un em eeschtryychische Herzog. Anne 1365 het r Heinrich vor em chaiserlige Läächesgriicht gchlagt, s Urdeil het aber d Hoheit vum Rudolf iber Känzinge und Herrschaft Kirnburg bstetigt. Wel dr Heinrich des aber allnonig het welle anerchänne, isch er iber e schließli anne 1366 d Ryychsaacht verhängt wore. D Stadt Fryybeg het vum Chaiser dr Befähl iberchuu, s Bindnis mit Känzinge z lese. 1369 isch Känzinge ändgiltig an Eeschtryych gange.
Eh un Chinder
[ändere | Quälltäxt bearbeite]Dr Heinrich IV. het vor em 29. Mai 1316 d Anna vu Üsenberg († 12. Juli 1356) ghyrote, e Dochter vum Burkard IV vu Üsenberg. Us däre Eh sin die Chinder fiirigange:
- Hesso, Markgruf vu Hachberg, † zwische 31. Mai 1409 un 14. Septämber 09.1409
- Otto I., Markgrof vu Hachberg, † 09. Juli 1386
- Johann, Herr vu Triberg, † zwische 19. Septämber 1409 un 8. Augschte 1411
- Kunigunde vu Hachberg, † no 1398, ∞vor em 15. Jänner 1373 Bertold II. vu Gliers zu Heimersdorf
- Agnes vu Hachberg, † no 1400, ∞ Thüring vu Ramstein, Freiherr zu Zwingen un Gilgenberg
- (uusicher) Clementia, Nunne im Chloschter Erstein
Literatur
[ändere | Quälltäxt bearbeite]- Detlev Schwennicke, Europaische Stammtafeln, Neue Folge, Band 1.2, Tafel 273. 1999. ISBN 978-3-465-03020-1
Weblink
[ändere | Quälltäxt bearbeite]- Hochburg bi Ämmedinge (www.uesenberger-webdesign.de)
- Kirnburg (www.uesenberger-webdesign.de)
| Vorgänger Heinrich III. |
Markgrof vu Bade-Hachberg 1330–1369 |
Nochfolger Otto I. |