Heilige Allianz

Us der alemannische Wikipedia, der freie Dialäkt-Enzyklopedy
Hops zue: Navigation, Suech
D Gründigsmitgliider vo dr Heiligen Allianz in de Staatsgränze vo 1840

Dr Usdruck Heiligi Allianz bezeichnet s Bündnis, wo die drei Monarche vo Russland, Östriich und Preusse währed ihrem Ufenthalt in Paris am 26. Septämber 1815 gschlosse hai, Frankriich isch dr Allianz 1818 bidrätte. D Allianz isch gege liberali und nationali Besträbige grichdet gsi.

Bündnisinhalt und Organisation[ändere | Quälltäxt bearbeite]

D Mitgliider vom Bündnis hai sich zum Gottesgnadedum vo de Herrscher bekennt und hai die christligi Religion as Fundamänt vo dr herrschende politische Ornig bezeichnet. Si hai sich verpflichtet, enander zum Schutz vo dere Ornig gegen alli bürgerlige und nationalstaatlige Umwälzige biizstoh. Fast alli europäische Monarche si dere Allianz biidrätte, und au die Schwiizerischi Eidgenosseschaft isch sit 1817 drbii gsi.

S Vollzugsorgan vo dr Heiligen Allianz isch d Quadrupelallianz gsi, wo am 20. Novämber 1815 zwüsche Russland, Grossbritannie, Östriich und Preusse abgschlosse worden isch. Mit dr Ufnahm vo Frankriich am 15. Novämber 1818 isch si zur Pentarchii worde. Für zum sich z koordiniere, si regelmässigi Zsämmekümft vorgseh gsi.

Interventione gege bürgerligi und nationali Besträbige[ändere | Quälltäxt bearbeite]

Uf em Kongräss vo Aache 1818 het die Heiligi Allianz über Underdruggigsmassnahme gege die bürgerlig-nationali Opposition in Dütschland berootet. Uf de Kongräss z Troppau und Laibach si militärischi Interventione gege die bürgerlige Umwälzige z Italie und die indiräkti Understützig vo dr Türkei gege dr nationali Befreijigskampf vo de Grieche beschlosse. Dr letzt Kongräss vo dr Heiligen Allianz, dr Veroneser Kongress 1822, het Frankriich dr Ufdrag gee die bürgerligi Revolution z Spanie niiderzschloo.

D Neuorganisation noch dr Julirevolution[ändere | Quälltäxt bearbeite]

Wo sich Grossbritannie scho z Verona ändgültig vo dr feudalreaktionäre Interventionspolitik distanziert het, het die Heiligi Allianz sit dr bürgerlige Revolution vo 1830 z Frankriich ihre gsamteuropäische Charakter und Iifluss verlore. Im Herbst 1833 hai Russland, Östriich und Preusse die Heiligi Allianz reaktiviert und hai vo denn aa s feudalreaktionäre Lager in Europa bildet, wo vo Russland as dr sterkste Feudalmacht uf em Kontinänt aagfüehrt und zsämmeghalte worden isch, au wenn d Mitgliider nid immer eiheitlig ufdrätte si.

Niidergang und Uflösig[ändere | Quälltäxt bearbeite]

Dr Karl Marx und dr Friedrich Engels hai dänggt, ass d Uflösig vo dr Heiligen Allianz dur dr gmeinsami Kampf vo de revolutionäre Völker die entscheidendi Vorussetzig für dr Siig vo dr bürgerlige Demokratii in Europa siig. Noch dr Niiderwärfig vo de bürgerlige Revolutione vo 1848/1849 het die Heiligi Allianz in dr Reaktionsperiode vo de 50er Johr vom 19. Johrhundert e Neuuflag und isch zum Instrumänt vo dr Hegemonii vom Zarismus über Dütschland worde. Wo sich aber die bürgerlige und nationalstaatlige Inträsse in dr Ussepolitik vo alle europäische Staate duregsetzt hai, isch die Heiligi Allianz an ihr Ändi cho.

Dr Krimchrieg het die Heiligi Allianz ändgültig fertig gmacht. Östriich, wo erst 1849 bim Ufstand vom ungarische Volk mit dr Hilf vo Russland vor em Zerfall grettet worden isch, het am 3. Juni 1854 Russland ufgforderet, sich us de Donaufürstedümer zruggzzieh und het die noch em russischen Abzug sälber bsetzt. D Beziehige zwüsche Östriich und Russland si dorum zerrüttet worde. D Beziehige vo Östriich zu Preusse si au agespannt gsi. Drzue isch no d Gfohr cho, ass es vo Grossbritannie und Frankriich under em Napoléon III., wo sich diplomatisch Russland gnöcheret het, isoliert wurd. So het sich die europäischi Mächtekonstellation, wo sit em Wiener Kongräss existiert het und relativ stabil usgseh het drotz vile inneren Unruehe in de verschiidene Staate, zu Ungunste vo Östriich veränderet.

Literatur[ändere | Quälltäxt bearbeite]

  • Ghervas, Stella. Réinventer la tradition. Alexandre Stourdza et l'Europe de la Sainte-Alliance. Paris, Honoré Champion, 2008. ISBN 978-2-7453-1669-1

Weblingg[ändere | Quälltäxt bearbeite]

Information icon.svg Dä Artikel basiert uff ere fräie Übersetzig vu dere Version vum Artikel „Heilige_Allianz“ vu de dütsche Wikipedia.

E Liste vu de Autore un Versione isch do z finde.