Ḫedammu
De Ḫedammu isch e Seetraach, wo im hurritsche Mythos d Götter und d Welt bidroot. De Mythos isch e Tail vom Kumarbi-Zyklus.
Inhalt
[ändere | Quälltäxt bearbeite]De Kumarbi, uuzfride, wel er vom sim Soo Tessub enthront woren isch, zügt mit de Serdapsuruḫi, de Töchter vom Meer, de Ḫedammu. De wachst im Meer uuf und werd e riisigs Monster, wo tuusigi vo Tier uuffresst und d Chüste verwüestet. D Liebesgöttin Sauska gsiet en und rennt verschreggt zo erem Brüeder Tessub. Er merggt as näbis nöd stimmt und fröögt si, wa loos sai, si aber sait nume: »I ha Angst vor Schlange!« D Götter versuechet si uufzmuntere und si verzellt denn, wa si gsie hett. De Tessub förchtets und foot a gränne.
De Eya, de Gott vo de Waishait, goot zom Kumarbi und frööget en, wiso er denn d Menschhait vernicht wöll: „Wenn Du d Menschhait zerstörsch, wer werd denn no a de Götter opfere? Niemert mee werd a der Broot opfere und Trankopfer. D Tessub werd müese e Pflueg i d Hand nee und d Ḫebat und d Sauska wered s Chorn selber male müese.“ D Sauska, wo sich wider erholt hett, griift zonere List. Si macht sich schöö und goot an Strand, zäme mit de Tiennerine Ninatta und Kulitta. Si zücht sich vorem Ḫedammu uus und zaigt em eri Brüst, si sprüet em Parföö aa und foot afe mitem flörte. Er chunnt sofort e riise Erektion öber und chrüücht lüstern as Land. S End vom Mythos isch nöd öberliferet, aber s sich klaar, de Ḫedammu werd woll vom Tessub töödt.
Verwandti Mythe
[ändere | Quälltäxt bearbeite]En ugaritische Mythos, wo z Ägypte uufgschribe woren isch, verzellt, wi de Meergott Yamm vo de Götter Tribut verlanget. D Liebesgöttin Astartu goot an Strand und verwicklet en ines Gsprööch. Au de biblisch Leviathan und de griechisch Typhon ghööred zo dem Myytetyp.
Literatur
[ändere | Quälltäxt bearbeite]- Volkert Haas: Die hethitische Literatur. Walter de Gruyter GmbH & Co. KG, Berlin 2006, Seiten 158 ff., ISBN 978-3-11-018877-6