S Huus zum Steblin

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen
S Huus zum Steblin
Dialäkt: Baseldütsch

S Huus zum Steblin isch e historischs Geböid in dr Schwizer Stadt Baasel. Er befindet sich in dr Groossbaasler Altstadt an dr Freije Strooss 27, wo dr Schlüsselbärg in die Freiji Strooss iinechunnt. S Huus isch s äinzige Bauwärk us em Spoote Barock an dr Strooss und isch äins vo de Kulturgüeter im Kanton Basel-Stadt, wo für d Region vo Bedütig si.

Baugschicht[ändere | Quälltäxt bearbeite]

D Liigeschaft isch 1308 zum erste Mol schriftlig erwäänt worde, wo dr Köönig Albrächt I. vo sim Nöwöö Johann vo Schwoobe bi Windisch ermordet worden isch und druf under dr Baasler Bürgerschaft e Tumult entstande isch. Die Königsdröije si vor de Pööbler ins Huus zum Rote Löi am Schlüsselbärg gflüchdet, und wo si sich dört nit häi chönne verstecke, si si uf s Dach klätteret und über s Gässli uf s Dach vom "Steblins Hus" üübere gumpt und vo dört ins Huus zum Schlüssel kho.[1] Dr Naame "Steblin" goot woorschinlig uf e früenere Bsitzer zrugg. Au dr Brunne wisawii het eso ghäisse.

1396 isch d Liigeschaft vom Ridder Sigermann vo Gundoltzhäim an dr Notar Symund Schällebärg verkauft worde udn für e baar Joorhundert vo aagseene Bürger bewoobt gsi. Woorschiinlig het em dr Apdeeker Nikolaus Bernoulli (1704-1786) 1762 si hütigi barocki Gstalt gee: e Vorderhuus, en Innehoof, e Nordflügel und e Hinderhuus am Schlüsselbärg. An dr südlige Parzällemuuse hets e Verbindigsgang mit Arkaade. Bis 1879 het d Liigeschaft dr Familie Bernoulli ghöört. Dr nöi Bsitzer het s denn lo umbaue und im Bardeer vom Vorderhuus e Laade iigrichdet mit eme Schaufänster us Holz und ere Iigangsdüüre uf d Strooss zue wo vorhär Bööge gsi si. Dr Hauptiigang isch vo denn aa im Flügelbau am Schlüsselbärg gsi, und dä Flügel het e vierte Stock überchoo. 1925 het mä die undere Hoffronte vom Vorder- und vom Hinderhuus abgrisse und dr Hoof überdacht, so dass es mee Blatz für Gschäftsrüüm im Bardeer gha het. Em Hinderhuus het mä e dritte Stock drufbaut und em Hauptgeböid und em Nordflügel e Mansardedach. 1972 isch dr Laade modärnisiert worde und mä het an dr Fassaade im Bardeer wider zwäi Bööge iibaut, wo s hindedraa en Arkade git.

Kwelle[ändere | Quälltäxt bearbeite]

Fuessnoote[ändere | Quälltäxt bearbeite]

  1. Christian Wurstisen: Baßler-Chronik, Thurneysen 1765, 1. Band, S. 160

Koordinaten: 47° 33′ 25″ N, 7° 35′ 22″ O; CH1903: 611349 / 267384