Hans Herbst

Dr Hans Herbst (* 1470 z Stroossburg; † 10. Novämber 1552 z Baasel) isch e Baasler Mooler gsi.

Lääbe

Dr Hans Herbst het gegen e Wille vo sim Vater Mooler welle wärde. Wil dä wüetig uf en gsi isch het er Stroossburg verloo und het in Süddütschland witer gleert und si Gsellefaart gmacht. Churz vor 1492 het er sich z Baasel niidergloo und isch 1492 as Moolermäister in dr Himmelzumft Brueder worde und druf Stadtbürger. Er isch in de Joor 1496, 1507, 1514 und 1521 Stubemäister vo dr Zumft gsi. Er het im Kontingänt vo dr Himmelzumft Milidärdienst gmacht, isch 1512 uf em Pavierzug und 1515 z Marignano und Mailand drbii gsi, möögligerwiis dur e Verdräter.

Dr Hans Herbst gältet as dr bedütendst Baasler Mooler vor em Holbäi, wo s ganze religiöse Wärk von em im Baasler Bildersturm undergange isch. Zum Herbst sine Bekannte häi dr Ambrosius Holbein und woorschinlig au dr Erasmus vo Rotterdam ghöört.

D Herbst isch gege d Reformazioon gsi und het am Oobemool nit welle mitmache und isch iigspert worde. Denn het er zwüschen em Dood dur s Schwärt und em öffentlige Widerruef müesse weele und isch eso 1530 zum nöije Glaube zwunge worde.

E grosse Däil vo sim Iikomme isch vo de Altarbilder cho und die het er noch dr Reformaziom nüme gha. Er het aber vo dr Stadt au noch 1530 chliineri Ufdrääg überchoo.

Dr Hans Herbst isch 1552 an dr Pest gstorbe.

Wärk (Uswaal)

1515 Aagmolti Dischblatte für e Hans Bär
1518 Altar für s Maria Magdalenekloster z Baasel

Litratuur

Lucas Wüthrich: Herbst, Hans. In: Neue Deutsche Biographie (NDB). Band 8, Duncker & Humblot, Berlin 1969, ISBN 3-428-00189-3, S. 590 f.
Lucas Wüthrich: Herbst, Hans. In: Historisches Lexikon vo dr Schwiiz.

Weblingg

Commons: Hans Herbst – Sammlig vo Multimediadateie

Herbst, Hans. In: Sikart (Lexikon un Datebank zue dr Chunscht in dr Schwyz un im Firschtetum Liechtestei).

Dä Artikel basiert uff ere fräie Übersetzig vum Artikel „Hans_Herbst“ vu de dütsche Wikipedia. E Liste vu de Autore un Versione isch do z finde.