Brüeder Kelterborn
| Gebrüder Kelterborn | |
|---|---|
| Unternähmensform | Partnerschaft |
| Gründig | 1889 |
| Sitz | Baasel, Schwiz |
| Branche | Archidekduurbüro |
| Dialäkt: Baseldütsch |
D Brüeder Kelterborn si e Baasler Archidekturbüro gsi, wo im spoote 19. und früeje 20. Joorhundert z Baasel däätig gsi isch und vor allem im Stiil vom Spoothistorismus, bsundrigs vo dr Nöigotik baut het. Dr Gustav isch dr elter vo de Brüeder gsi und het 1872 s Büro ufdoo, dr jünger Brueder Julius isch 1889 Partner worde.
S Büro[ändere | Quälltäxt bearbeite]
1872 het dr Gustav Kelterborn z Baasel en Archidekturbüro ufdoo. Vo dr Usbildig här isch er em Historismus vo dr norddütsche Bachstäigotik verbunde gsi, und s Büro het solang s bestande het, blastischi, asümmetrischi Wärk mit de tüpisch neogotische Verzierige und Bauforme wie Erker, vilfältigi Dachforme und stark gliidereti Baukörper und de Fänster- und Düüreforme, wo drzueghöört häi, entworfe. Nume e baar Bauwärk ghööre zur Neorönessans, wo denn äigentlig üübliger gsi isch, nume d Freimuurerloosche zum Neoklassizismus, und im Spootwärk cha mä au dr Iifluss vom Juugedstiil gsee. Dr Kelterborn het z Baasel uf äigeni Fust zum Bischbil die neogotischi Schlössli-Willa an dr Hardstrooss 1 baut, d Erstaalaag vom eltiste Schwizer Zolli und zämme mit em Paul Reber und em Kantonsbaumäister Heinrich Reese d Häil- und Pfläägaastalt Fridmatt. Er het au bi dr Restaurierig vom Münster und vo dr Bredigerkiirche mitghulfe.
1889 isch si Brueder Julius zun em gstoose und iir gmäinsams Büro het e Räije vo Woonhüüser, Willene und Gschäftshüüser baut. Under de Bauwärk isch d Freimuurerloosche an dr Byfangstrooss und öffentligi Geböid wie s Brimarschuelhuus am Rhii oder s Baasler Sanatorium z Davos. S Büro het die Senn'schi Bandfabrik baut und d Chraftstazioon vom Elektrizidäätswärk vo 1898, wo äins vo de wenige Zügniss vo dr früeje Energiiversorgig in dr Schwiz isch, wo no existiert. Au iiri Dramwarthalle im Jugedstiil am Äscheblatz vo 1908 git s no.
E baar vo de Wärk[ändere | Quälltäxt bearbeite]
- D Freimuurerloosche, 1889, Byfangwäg 13[1]
- Die Senn'schi Bandfabrik, 1895, Spiddaalstrooss 12[2]
- D Basler Heilstätte für Brustkranke, 1895-96, Baaslerstrooss 5, Davos[3]
- S Gschäftshuus Zum Blaue Maa, 1896, Freiji Strooss 44[4]
- S Elektrizidäätswärk vo dr Stadt Baasel, 1898, Voltastrooss 29[5]
- S Gschäftshuus Zum Goldige Ort, 1899–1900, Freiji Strooss 101[6]
- S Brimarschuelhuus am Rhii, 1899–1902, Undere Rhiiwäg 160[7]
- S Woonhuus Wäffler, 1904-05, Arnold-Böcklin-Strooss 11[8]
- D Dramwarthalle Aescheblatz, 1908, Dalbe-Aalaag 12a[9]
- S Gschäftshuus zum Platanebaum, 1910, Freiji Strooss 72[10]
Litratuur[ändere | Quälltäxt bearbeite]
- Rolf Brönnimann-Burckhardt: Die Architekten Gustav und Julius Kelterborn und die Villa Burgstrasse 117 in Riehen. In: Jahrbuch z’Rieche 1982 (online).
- Romana Anselmetti: Kelterborn, Gustav und Julius. In: Isabelle Rucki und Dorothee Huber (Hrsg): Architektenlexikon der Schweiz – 19./20. Jahrhundert. Birkhäuser, Baasel 1998, ISBN 3-7643-5261-2, S. 310 f.
Weblingg[ändere | Quälltäxt bearbeite]
- Romana Anselmetti: Kelterborn, Julius. In: Historisches Lexikon vo dr Schwiiz.
Fuessnoote[ändere | Quälltäxt bearbeite]
- ↑ INSA Bd. 2, S. 137/1.
- ↑ INSA Bd. 2, S. 217/1.
- ↑ Hanspeter Rebsamen, Werner Stutz u. a.: Inventar der neueren Schweizer Architektur – 1850–1920. Davos. Band 3 der Gesamtreihe. Bärn: Gesellschaft für Schweizerische Kunstgeschichte. Orell-Füssli, Züüri 1982. S. 388/1. ISBN 3 280 01397 6
- ↑ INSA Bd. 2, S. 155/1.
- ↑ INSA Bd. 2, S. 226/3.
- ↑ INSA Bd. 2, S. 152/3.
- ↑ INSA Bd. 2, S. 225/1.
- ↑ INSA Bd. 2, S. 226/3.
- ↑ INSA Bd. 2, S. 122/3.
- ↑ INSA Bd. 2, S. 155/2.
|
Dä Artikel basiert uff ere fräie Übersetzig vum Artikel „Gustav_und_Julius_Kelterborn“ vu de dütsche Wikipedia. E Liste vu de Autore un Versione isch do z finde. |