Gopfriid vo Stroossburg

Dr Gopfriid vo Stroossburg († um 1215) isch äine vo de bedütendste dütschsproochige Dichter im Middelalter gsi. Er het vom Ändi vom 12. bis ins früeje 13. Joorhundert gläbt und isch e Zitgnoss vom Hartmaa vo Aue, Wolfram vo Eschebach und vom Walther vo dr Vogelwäid gsi.

Lääbe und Wärk

Vom Elsässer Gopfriid si käini urkundlige Züügniss erhalte, so ass mä si Lääbe nit genau cha rekonstruiere. Die früeste und bedütendste Informazione liiferet dr middelhochdütschi Epiker Rudolf vo Ems. In däm sim Wärk Der guote Gêrhart säit er, ass im Gopfriid vo Stroossburg si Hauptwärk Tristan iin bim Schriibe vom Guoten Gêrhart beiiflusst häig. Dr Tristan isch um 1210 entstande und het dr Tristan und Isolde-Stoff bearbäitet, aber nume Fragmänt vo däm Värsroman si no erhalte bliibe. Im en andere Wärk vom Rudolf, em Alexander, wird uf e Gopfriid as Epiker und Sangspruchdichter von ere Spruchstroofe in dr Groosse Häidelbärger Liederhandschrift (Codex Manesse) aanegwiise, dört häisst s allerdings, ass dr Ulrich vo Liechtestäi iire Verfasser sig.

In dr Forschig gältet as sicher, ass dr Gopfriid e Bildig gha het, wo über s Trivium, die uniwersitääri Grundusbildig, uusegange isch, und mit dr höfische Litratuur und sich au mit dr Intelligänz vom 12. Joorhundert uskennt het. Es cha si, ass er z Bariis oder z Bolonia studiert und zitgenössischi latiinischi Schrifte kennt het.

Es isch woorschinlig, ass im Gopfriid si Abstammig nid adlig gsi isch und ass er as Kleriker wältligi Ufgoobe übernoo het. Us em Tristan leert mä, ass er für si Gönner Dieterich, wo us dr Stroossburger Oberschicht gsi isch, gschafft het.

Dr Gopfriid isch vermuetlig zwüsche 1210 und 1220 vor er si Tristan fertig gschriibe het.

Erhalteni Wärk

Tristan
E baar lürischi Gedicht in dr Groosse Häidelbärger Liederhandschrift

Litratuur

Reinhold Bechstein: Gottfried von Straßburg. In: Allgemeine Deutsche Biographie (ADB). Band 36, Duncker & Humblot, Leipzig 1893, S. 502–506.
Hugo Kuhn: Gottfried von Straßburg. In: Neue Deutsche Biographie (NDB). Band 6, Duncker & Humblot, Berlin 1964, ISBN 3-428-00187-7, S. 672–676.

Christoph Huber: Gottfried von Straßburg. Tristan. Erich Schmidt Verlag, Berlin 2000, ISBN 3-503-04959-2.
Tomas Tomasek: Gottfried von Straßburg. Reclam, Stuttgart 2007, ISBN 978-3-15-017665-8.
Walter Haug: Gottfried von Straßburg. Tristan und Isolde. Deutscher Klassiker Verlag, Berlin 2011, ISBN 978-3-618-66100-9.

Weblingg

Gottfried von Straßburg im dütschsprochige Wikisource

Wärch vu un iber Gottfried von Straßburg in dr Dytsche Digitale Bibliothek
Gottfried von Straßburg im Codex Manesse
Wärch vu Gottfried von Straßburg. In: Zeno.org.
Wärch vu Gottfried von Straßburg. In: Projekt Gutenberg-DE.
Linksammlung der Universitätsbibliothek der Freien Universität Berlin
E Minnelied wo villicht vom Gopfriid vo Stroossburg verfasst worde isch: „Diu zît ist wunneclich“ (MFKS 129 = KLD 16.[III)]

Dä Artikel basiert uff ere fräie Übersetzig vum Artikel „Gottfried_von_Straßburg“ vu de dütsche Wikipedia. E Liste vu de Autore un Versione isch do z finde.