Gerhard Mayer-Vorfelder

Dialäkt: Undermarkgreflerisch

dr Gerhard Mayer-Vorfelder (2011)

dr Gerhard Mayer-Vorfelder (2009)

Dr Gerhard Mayer-Vorfelder (* 3. Merz 1933 z Mannem as Gerhard Mayer; † 17. Augschte 2015 z Stuegert) isch e dytsche Bolitiker (CDU) un Sportfunktionär gsii. Är isch vu 1980 bis 2001 Abgordnete im Landdag vu Bade-Wirttebärg un vu 1980 bis 1991 Kultus- un vu 1991 bis 1998 Finanzminischter vum Land Bade-Wirttebärg gsii. Vu 1975 bis 2000 isch dr Mayer-Vorfelder Bresidänt vum Fueßball-Bundesligischt VfB Stuegert un vu 2001 bis 2006 Bresidänt vum Dytsche Fueßball-Bund gsii.

Lääben un Uusbildig

Dr Gerhard Mayer-Vorfelder isch dr Suhn vun eme badische Oberregierigsrot gsii. Go ne Verwächslig mit Familie mit em glyche Name uuszschließe, het sy Vater het anne 1935 zue sym Name „Mayer“ no dr Geburtsname vu dr Großmueter vu dr Vatersyte här derzuedue un het ab do „Mayer-Vorfelder“ ghaiße.

Dr Mayer-Vorfelder isch z Charlsrue uf d Volksschuel gange un derno z Waldshuet un z Friburg uf s Gymnasium. Noch em Abitur anne 1952 het er vu 1952 bis 1959 z Friburg un z Haidelberg Jura studiert. Noch em Assessorexame anne 1959 het er bis 1963 as Regierigsrot bim Landrotsamt z Nirtenga gschafft.

Anne 1963 isch er in d Kommunalabdailig vum Inneminischterium vu Bade-Wirttebärg gwächslet un isch e persenlige Referänt vum Inneminischter Hans Filbinger wore. Wu dää anne 1966 Minischterbresidänt woren isch, isch dr Mayer-Vorfelder sy Referänt blibe.

Är isch ghyrote gsii mit dr Margit Deutschle un het mit ere vier Chinder ghaa.

Bolitik

Anne 1976 isch dr Mayer-Vorfelder bolitische Staatssekretär im Staatsminischterium wore. Vu 1976 bis 1978 isch er Staatssekretär mit Kabinettsrang im Finanzminischterium gsii. Unter erm Minischterbresidänt Lothar Späth isch er anne 1980 Noofolger vum Roman Herzog bade-wirttebärgische Minischter fir Kultus un Sport wore, was er bis zum Ruggdritt vum Späths anne 1991 bliben isch. Em Spätz sy Noofolger Erwin Teufel het dr Mayer-Vorfelder zum Finanzminischter ernännt. Des Amt het er bis 1998 bhalte, sy Noofolger isch dr Gerhard Stratthaus wore.

Von 1980 bis 2001 het dr Mayer-Vorfelder dr Wahlkreis Stuttgart II als Abgordnete im Landdag vu Bade-Wirttebärg verdrätte.

Sportfunktionär

Vu 1968 bis 1985 isch dr Mayer-Vorfelder Vorstandsmitglid vum Wirttebärgische Fueßball-Verband gsii. Anne 1975 isch er Bresidänt vum VfB Stuegert wore. Wel dr Verain isch Lauf vu dr Johr all meh Schulde ufghyft het, het dr Ufsichtsrot em Mayer-Vorfelder im Juni 1999 s Missdröuen uusgsproche. Är isch derno am 30. Oktober 2000 zruggdrätte, sy Noofolger isch dr Manfred Haas wore. Am 28. April 2001 isch dr Mayer-Vorfelder zum Bresidänt vum DFB gwehlt wore. Noch em Uusschaide vu dr dytsche Nationalmannschaft bi dr Fueßball-Europamaischterschaft 2004 z Portugal un em Ruggdritt vum Rudi Völler as Teamchef isch dr Mayer-Vorfelder in d Kritik grote. Ab em 23. Oktober 2004 het er dr DFB in eme Doppelspitz mit em Theo Zwanziger gfiert, go ne Kampfabstimmig verhindere. Bim dr negschte Wahl het er derno nimi kandidiert un am 8. Septämber 2006 isch er us em Amt as DFB-Bresidänt uusgschide. Vu 1992 bis 1998 un wider vu 2002 bis 2007 isch er Mitglid vum FIFA-Exekutivkomitee gsii un bis Merz 2009 Mitglid vum UEFA-Exekutivkomitee. Von 2007 bis Merz 2009 isch er au Vizebresidänt vu dr UEFA gsii.

Derzue isch dr Mayer-Vorfelder Ehrebresidänt vum VfB Stuegert un Mitglid im Kuratoriums vu dr Bundesliga-Stiftig gsii.

Uuszaichnige

• Bundesverdienschtchryz am Band
• Verdienschtmedallie vum Land Bade-Wirttebärg
• Großes Ehrezaiche fir Verdienscht um d Republik Eschtrych (2004)
• Ehredoktorwird vu dr Assen-Slatarow-Universitet Burgas, Bulgarie (2001)

Schrifte

• Ein stürmisches Leben: Erinnerungen. Hohenheim-Verlag, Stuttgart; Leipzig 2012, ISBN 978-3-89850-205-4.

Weblink

 Commons: Gerhard Mayer-Vorfelder – Sammlig vo Multimediadateie

• Wärch vu un iber Gerhard Mayer-Vorfelder in dr Dytsche Digitale Bibliothek
• Gerhard Mayer-Vorfelder uf whoswho.de, abgruefen am 19. Augschte 2015