Dr Friide vo Campo-Formio

Us der alemannische Wikipedia, der freie Dialäkt-Enzyklopedy
Mitteleuropa noch de Friidensschlüss vo Basel und Campo Formio

Dr Friide vo Campo-Formio isch am 17. Oktober 1797 zwüschen Frankriich, wo vom Napoléon Bonaparte verdräte worden isch, und em dütsche Kaiser Franz II. in siiner Eigeschaft as Landesherr vo de habsburgische Erbländer (ufgrund vo dr pragmatische Sanktion - bsundrigs as König vo Ungarn und Böhme und Erzherzog vo Östriich) abgschlosse worde.

Dr Friide het dr Erst Koalitionschrieg, wo Frankriich am 20. April 1792 agfange het, beändet.

Dr Verdrag het dr Verzicht vom Kaiser uf die östriichische Niiderland zugunste vo Frankriich bestimmt und het e Neuornig vo Oberitalie und de Bsitz vo dr Republik Venedig noch sich zoge. Dr Kaiser het d Unabhängigkeit vo dr Cisalpinische Republik anerkennt und het im Gegezug d Republik Venedig samt deren ihre Bsitz bis zum Fluss Etsch übercho, drzue Istrie, Dalmatie und d Bucht vo Kotor. Iigschlosse isch au die grossi venezianischi Chriegsflotte gsi, wo in de Johrzähnt druf s Härzstück vo dr östriichische Chriegsmarine bildet het. Frankriich het d Lombardei bhalte und die Ionische Insle Korfu, Zakynthos und Kefalonia.

Frankriich het jetzt zum erste Mol sit 1792 in Kontinentaleuropa Friide gha. Dr Chrieg mit Ängland isch wiiter gange.

Für die dütschi Gschicht hai die gheime Zuesatzartikel vom Vertrag bsundrigi Bedütig gha. Der Kaiser het mit ihne dr Rhii as Ostgränze vo Frankriich anerkennt und uf die linggsrhiinische Riichsgebiet wie dr jurassisch Deil vom Fürstbistum Basel verzichdet.

Die ändgültige Reglige mit em Heilige Römische Riich Dütscher Nation si em Rastatter Kongress (9. Dezämber 1797 bis 23. April 1799) vorbehalte bliibe. Dä het aber wägem Usbruch vom Zweite Koalitionschrieg nie chönne z Änd gfüehrt wärde.

Dr Name Campo-Formio bezeichnet kei Ort, sondern e Fäld (italiänisch: campo) westlig vo Udine im Friaul, Oberitalie, wo sich au en Ort mit em Name Campoformido befindet. Dr Friidensverdrag isch aber weder uf em Campo Formio no z Campoformido underschriibe worde - dört isch s Lager vo dr östriichische Armee gsi. Vilmeh het die östriichischi Armeeleitig müesse zum Hauptquartier vom Napoléons fahre: zur Villa Manin, öbbe 25 km westlig vo Udine. Dört het dr Napoleon d Östriicher bis spoot in d Nacht lo warte, bevor er zum Underschriibe erschiine isch.

Lueg au: Französischi Revolution

Weblingg[ändere | Quälltäxt bearbeite]

Dä Artikel basiert uff ere fräie Übersetzig vu dere Version vum Artikel „Frieden_von_Campo_Formio“ vu de dütsche Wikipedia. E Liste vu de Autore un Versione isch do z finde.