Franz Xaver Wagner
Der Franz Xaver Wagner, wo am 28. Februar 1805 z Lauffeburg uf d Wält cho und am zääte Jänner 1879 gstorben isch, isch e Schwiizer Jurischt, Dichter und Politiker gsi.
Nach em Studium z Fryburg und z Tübinge, dört näben andere au bim Ludwig Uhland, isch er 1832 Sekretäär vo der aargauische Regierig woorde. Und er isch au der Sekretär vom aargauische katholische Chileroot gsi.
Sid synere Zyt z Tübinge het er under em Psöidonüm Wagner von Laufenburg Gedicht gschribe. Es sind chürzeri Väärs und au lengeri Ballaade. Sys Stück Der Laufengeiger isch wytume bekant woorde. Em Wagner syni Gedicht het men in divärse Zytschrifte chönne lääse, öpen i den «Alpenrosen».
1844 isch er der Rootsschryber z Aarau worde, und me het ii nau in Groossrot gwählt, und 1850 isch er in Chly Root, wie d Kantonsregierig zu säbere Zyt gheisse het, cho. Vo dämm Ampt isch er scho zwöi Joor spöter wider zruggträtte, zum meh Zyt z ha für s Dichte.
Literatur
[ändere | Quälltäxt bearbeite]- Raoul Richner: Franz Xaver Wagner. In: Historisches Lexikon vo dr Schwiiz.
- Biographisches Lexikon des Kantons Aargau 1803–1957. Aarau 1958. S. 810–812.
- Helmuth Mojem (Bearb.): Ludwig Uhland, Das Stylisticum. Band 2: Die Beiträger. Biographien und Dokumente. Wallstein, Göttingen 2022, ISBN 978-3-8353-5146-2, S. 971–996.
- Anton Senti: Franz Xaver Wagner von Laufenburg (1809-1879). In: Vom Jura zum Schwarzwald: Blätter für Heimatkunde und Heimatschutz, 32, 1957, S. 1–18.
Weblink
[ändere | Quälltäxt bearbeite]
Franz Xaver Wagner im dütschsprochige Wikisource