Franz Hotz

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen

Dr Franz Hotz (* 10. Oktober 1860 z Inwil; † 5. Juni 1927 z Zug) isch e Schwiizer Techniker und Mundartschriftsteller gsi.

s Läbe[ändere | Quälltäxt bearbeite]

Dr Franz Hotz isch dr Soon vom Franz Josef Hotz vo Baar und vo dr Anna Josepha Hüürlimaa gsi. Er het d Schule z Baar psuecht, und won er nonig lang im Gymnasium gsi isch, het er Vatter und Muetter verloore. So het er nid lenger chänne id Schuel go, und drno isch er i dr Spinnerei Baar go schaffe. Do isch er e Fyynmechaniker worde. Nach dr Lehr isch er uf d Walz, und als Gsell isch er dur halb Düütschland und uf Frankrych ggange.

Won er zrugg cho isch, het er zerscht bim Escher-Wyss z Örlike als Dräjermäischter gschaffet und spöter bim Sulzer z Wintertuur. Denn isch er wider uf Baar id Spinnerei zrugg.

Er het d Karolina Andermatt vo Baar ghürootet, und mit iire isch er nomol is Ussland, won er i grossi Fabrigge isch go schaffe, uf Düütschland und uf Russland und Pole und denn au no uf Riga z Estland. Wo si zää Joor furt gsi sind, het s e se wider id Heimet zoge, und dr Franz Hotz het im Ysewärch vo dr Von Roll i dr Chluus dr Poschte vom Wärchfüerer übercho. 1914 isch er wider uf Zug ggange, won er no i dr Landis & Gyr gsi isch.

Em Techniker, wo so vil i dr Wält umecho isch, het s Schryybe guet gfalle. Au us dr Frömdi het er für d Zuger Sache gschribe, wo dört i Zytschrifte abtrukt worde sind. Und won er äntlech ganz im Zugerland bliben isch, het er sech als Aktuar für Verein angaschiert. Au jetz het er wider nöji Gedicht ufgsetzt. Wie dr J. Rieser im Läbeslauf vom Hotz seit, sind bsunders zwöi Gruppe vo dem sine Gedicht bedütend: die won er über sini Zyt als Gsell uf dr Walz schrypt – was süsch i dr düütsche Literatur sehr sälten isch – und d Mundartgedicht. Die beide Gedichtbänd Am Wegrand und Auf einsamen Pfaden sind bi de Rezensänte vo verschideni Zytige ganz guet acho.

S Gedicht All Zyte gönd vom Franz Hotz isch im Adolf Guggebüel und em Georg Thürer irem Lyrikband Schwyzer Meie abtrukt.

Literatur[ändere | Quälltäxt bearbeite]

  • J. Rieser: Franz Hotz, In: Zuger Neujahrsblatt, 1927, S. 23–26.

Wärch[ändere | Quälltäxt bearbeite]

  • Am Wegrand, Gedicht, 1913
  • Auf einsamen Pfaden, Gedicht, 1918
  • Gedenkblatt für den unvergesslichen Professor Rudolf Weiss, 1922