Fossile Energie

Us der alemannische Wikipedia, der freie Dialäkt-Enzyklopedy
Hops zue: Navigation, Suech
Daagabbau vo Stäichoole z El Cerrejón in Kolumbie

Fossili Energii wird us fossile Brennstoff gwunne, wie Bruunchoole, Stäichoole, Torf, Ärdgaas und Ärdööl. Die fossile Energiidrääger si in dr geologische Vorzit us Abbaubrodukt vo doote Pflanze und Dier entstande. Die fossile Energidrääger basiere uf em Choolestoffkräislauf und mit ene cha mä Sunneenergii verwärde, wo vor langer Zit gspiicheret worde isch. Die technischi Erschliessig vo fossile Brennstoff im 18. und 19. Joorhundert häi d Vorussetzige für die Industrielli Revoluzioon gschaffe.

Im Joor 2005 si 81 % vo dr Energii, wo uf dr Wält brucht worde isch, us fossile Kwelle choo.[1]

Die fossilen Brennstoff basiere uf organische Choolestoff-Verbindige. Noch em Wältklimaroot sin si e wichdige Grund für die globali Erwermig.[2] Wenn si mit Suurstoff verbrennt wärde, wird Energii in dr Form vo Wermi broduziert und Choolestoffdioxid freigsetzt. Je noch dr Zämmesetzig und Räinhäit vom fossile Brennstoff git s no anderi chemischi Verbindige wie Stickstoffoxid und Ruess und underschiidlig fiini Stöib, wo d Umwält chönne belaste.

Dr Gegebegriff zur fossile Energii isch die ernöijerbari Energii, wo us energetische Brozäss chömme, wo sich die ganz Zit ernöijere. Doodrzue ghöört d Windenergii, d Sunnestraale, d Wasserchraft und d Biomasse, wo vor dr industrielle Revoluzioon d Hauptenergiikwelle vo dr Menschhäit gsi sin. D Ärdwermi isch vor allem in dr Form vo Thermalkwelle für e Mensch intressant gsi, wäärend Geziteau hüte no schwiirig zum usnütze sin.

Fuessnoote[ändere | Quälltäxt bearbeite]

  1. Internationale Energieagentur: Key World Energy Statistics 2007. S. 6.
  2. Intergovernmental Panel on Climate Change (2007): IPCC Fourth Assessment Report - Working Group I Report on „The Physical Science Basis“.