Choolestoffdioxid

Us der alemannische Wikipedia, der freie Dialäkt-Enzyklopedy
Hops zue: Navigation, Suech

Choolestoffdioxid oder Chooledioxid isch e chemischi Verbindig us Choolestoff und Suurstoff mit dr Summeformle CO2. Wenn s in Wasser glööst isch säit men em vilmol – bsundrigs im Zämmehang mit chooledioxidhaltige Getränk – Cholesüüri, was ungnau isch.

Choolestoffdioxid isch e unbrennbars, suurs, farb- und gruchloses Gas, wo guet in Wasser lööslig isch. Mit basische Metalloxid oder -hüdroxid bildet es zwei Arte vo Salz, wo men e Carbonat und Hydrocarbonat säit.

Choolestoffdioxid isch e natürlige Bestanddäil vo dr Luft. Im Joor 2013 het s e middleri Konzentrazion vo 0,040 Volumebrozänt (400 ppm) ghaa.[1] Die Konzentrazioon isch sit em Aafang vo dr Industrielle Revoluzioon gwaggse und wil s Chooledioxid e wichdigs Driibhuusgaas isch, warne Klimaforscher vor ere Klimakatastroofe.

Übersicht über d Fotosünthese und Atmig

S Choolestoffdioxid entstoot, wenn choolestoffhaltigi Substanz vollständig verbrennt wärde. Im Organismus vo Lääbewääse ish s e Brodukt vo dr Zällatmig. Pflanze, Alge sowie mönggi Bakterie und Archaeä wandle Choolestoffdioxid dur Fixierig in Biomasse um. Bi dr Fotosünthese entstoot us anorganischem Choolestoffdioxid und Wasser Glucose. Choolestoffdioxid isch e wichdige Bestanddäil vom globale Choolestoffzüklus. Es cha toxischischi Uswirkige ha, aber d Konzentrazioon in dr Luft länge nid für daas und au nid wemm mä Glüürliwasser drinkt.

Chooledioxidleiser

Chooledioxid wird technisch vil aagwändet. In dr chemische Industrii wird s zum Bischbil brucht zum Harnstoff broduziere. Gfroore wirds as Froocheniis als Chüelmittel verwändet, überkritischs Choolestoffdioxid wird as Lösigs- und Extraktionsmiddel iigsetzt.

Litratuur[ändere | Quälltäxt bearbeite]

Weblingg[ändere | Quälltäxt bearbeite]

 Commons: Choolestoffdioxid – Sammlig vo Multimediadateie

Fuessnoote[ändere | Quälltäxt bearbeite]

  1. Brian Clark Howard: Northern Hemisphere Cracks 400 ppm CO₂ for Whole Month for First Time. In: National Geographic. 2014-05-27. Abgrüeft am 2014-06-30.