Fabianus

Us der alemannische Wikipedia, der freie Dialäkt-Enzyklopedy
der häilig Fabianus,
uf eme Glasgmäld us em
15. Johrhundert i der evangelische Stadtchilche Raveschburg

Dr hailig Fabian, latynisch Fabianus, oder au Flavius (* vor 200 z Rom; † 20. Jänner 250 ebedert), Bischof un Märtyrer, isch im Jänner 236 zum Bischof vu Rom gwehlt un am 10. Jänner 236 noch ere sibedägige Sedisvakanz as Noofolger vum Anterus inthronisiert wore. Sy Name bedytet: „us em Gschlächt vu dr Fabier“ (latynisch).

Lääbe[ändere | Quälltäxt bearbeite]

Dr Eusebius vu Caesarea brichtet, wie d Chrischte, wu si z Rom versammlet ghaa hän go ne neie Bischeof wehle, gsää hän, wie si uf em Chopf vum Fabian e Duube nidergloo het. Mer heb doderdur gfunde, ass dr Fabian, e Laie un Främde in dr Stadt, uusgwehlt sei fir die Wird, un är isch zum Bischof ernännt wore, drotz ass es e Huffe anderi, starki Kandidate fir d Bsetzig vum vakante Stuel gee het. Är isch bis zue sym Dod Bischof blibe. Dr Fabian isch as Märtyrer gstorbe in dr Zyt vu dr Verfolgige dur dr Chaiser Decius am 20. Jänner 250. Är isch in dr Calixtus-Katakombe z Rom bstattet wore. Sy Sarkophag het me 1915 entdeckt.

Au wänn s wenig bstetigti Quällen us sällere Zyt het, git s doch gnue Hiiwys druf, ass s Episkopat vum Fabianus großi Bediytig in dr Gschicht vu dr frieje Chilche ghaa het. Är soll d Chilche nei organisiert un au e Huffe Gmaine im hitige Frankrych grindet haa.

Är isch in Glaubesfrooge mit em Origenes in Verbindig gstande, em große Chilchelehrer vum Oschte. No dr Iberliferig het er Rom in sibe Diakonatsbezirk mit 7 Diakon un 46 Presbyter yydailt: S isch di friescht Grundlag vu dr spetere Kardinalstitelchilche, wie s si hite git.

Schutzpatron[ändere | Quälltäxt bearbeite]

Dr hailige Fabian giltet as Schutzpatron vu dr Hafner un Zinngießer. Derzue isch er zäme mit em hailige Sebastian dr Schutzpatron vu dr Stadt Selm z Weschtfale.

Syni Attribut sin s Papschtchryz, s Schwärt un e Duube.

In syre Heimatstadt Rom isch dr hailig Fabian dr Names- un Schutzpatron vu dr Titelchilche Santi Fabiano e Venanzio. Derzue isch er Patron vu vyl anderne Chilche.

E Dail vu dr Reliquie, dodrunter au der Chopf vum hailige Fabian, stehn uf em Hauptaltar im Dom z Fulda. D Bai vum Hailige sin wahrschyns mit em Rabanus Maurus uf Fulda chuu. Sy Hauptgrab mit em greschte Dail vu dr Bai isch in dr remische Chilche Santa Prassede. Dert ane sin si vu dr Calixtus-Katakombe iberfiert wore.

Gedänkdag[ändere | Quälltäxt bearbeite]

  • Katholisch: 20. Jänner (Nit gebotene Gedänkdag im Allgmaine Remische Kaländer).
  • Orthodox: 5. Augschte

Buureregle[ändere | Quälltäxt bearbeite]

Zum Gedänkdag vum Hailige Fabainus git s e Huffe Buuregele:

  • An Fabian und Sebastian fängt der rechte Winter an.
  • Um Fabian und Sebastian, da fängt der Baum zu saften an.
  • Sturm und Frost an Fabian, ist allen Saaten wohlgetan.
  • Fabian im Nebelhut, der tut den Bäumen gar nicht gut.
  • Tanzen um Fabian schon die Mücken, muss man später den Kühen das Futter bezwicken.
  • Sonnenschein um Fabian und Sebastian, der lässt den Tieren das Futter ausgah'n.
  • Um Fabian und Sebastian, da nimmt auch der Tauber die Taube an.

Literatur[ändere | Quälltäxt bearbeite]

  • Friedrich Wilhelm Bautz: Fabian. In: Biographisch-Bibliographisches Kirchenlexikon (BBKL). Band 1, Hamm 1975, Sp. 1586.
  • Ytrag in d Catholic Encyclopedia, Robert Appleton Company, New York 1913 (änglisch)

Weblink[ändere | Quälltäxt bearbeite]

 Commons: Fabianus – Sammlig vo Multimediadateie
Dä Artikel basiert uff ere fräie Übersetzig vu dere Version vum Artikel „Fabianus“ vu de dütsche Wikipedia. E Liste vu de Autore un Versione isch do z finde.