Emma Graf

D Emma Graf (* 11. Oktober 1865 z Langetu; † 22. Nofämber 1926 z Bärn) isch e Schwiizer Frauerächtlere gsi.

s Läbe

D Emma het Schnydere gleert, und derno het si no s Bärner Lehrerinneseminar bsuecht und a dr Uni Bärn studiert. 1901 het si dr Doktertitel übercho.

Si het denn as Lehrere gschaffet und wyter über d Gschicht, bsunders über d Fraue i der Zyt vo dr Romantik gforschet. Vo 1902 bis 1920 isch si d Presidäntin vom Schwiizerische Lehrerinneverein gsi.

D Emma Graf isch d Redaktorin vo der Schwiizerische Lehrerinnezytig worde, und 1914 het si s Johrbuech vo de Schwiizerfraue uf d Bei gstellt. Sid 1912 het si sech für d Schwiizer Frauestimmrächtsbewegig engaschiert. 1921 isch si d Presidäntin vom Zwöite Schwiizer Frauekongräss worde.

Literatur

• Regula Ludi: Graf, Emma. In: Historisches Lexikon vo dr Schwiiz.