Elizabeth Blackwell (Medizineri)

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen
d Elizabeth Blackwell, um 1900/1905
d Elizabeth Blackwell mit ihre Dochter Katharine "Kitty" Barry Blackwell, um 1905
US-amerikanischi Briefmarke vu 1974 zum 125. Johresdag vum Studium-Abschluss vu dr Blackwell

D Elizabeth Blackwell (* 3. Februar 1821 z Counterslip bi Bristol, Ängland; † 31. Mai 1910 z Kilmun, Schottland) isch aini vu dr eerschte Dekterne mit eme Hochschuelabschluss gsii. Näb ihrem Yysatz fir s Frauestudium het si Pionierarbet in dr Breväntivmedizin un dr Gsundhaitsbolitik glaischtet. Wie ihre Bruder Henry Blackwell un däm sy Frau Lucy Stone het si si au fir d Abschaffig vu dr Sklaverei yygsetzt.

Lääbe[ändere | Quälltäxt bearbeite]

D Familie Blackwell isch 1832 in d USA zoge, wu 1838 dr Familievater gstorbe isch. Go fir d Familie sorge, het d Mueter vu dr Elizabeth zäme mit ihre Dechere ne Privatschuel gfiert. D Elizabeth het welle Medizin studiere, isch aber – as Frau – vu zwelf Colleges abglähnt wore. Eerst Mitti vu dr 1840er Johr het si ne Studieblatz am Geneva College z New York gfunde, wu si 1849 as eerschti US-amerikanischi Dokteri un as beschti vu ihrem Johrgang[1] ihre Abschluss gmacht het.

S isch schwirig fir d Blackwell gsii, as Dokteri z braktiziere, wel uf aireSyte nieme ihre het welle Praxisryym vermiete, uf dr andere Syte d Paziäntine un Paziänte ere Frau gegeniber seli skeptisch gsii sin. Chrankehyyser hän si nit welle yystelle un wu si uf Paris gfahren isch, isch ere nit emol ihre Dokterdiplom anerkännt wore.[1] Z New York he si schließlig e aigeni Praxis ufgmacht. Doderzue het si zeerscht e aige Huus mieße chaufe, welk ai Huusbsitzer an d Dokteri vermietet het. Anne 1854 het si ne Sammlig vu Täxt iber en iber d Hygiene unter em Titel The Laws of Life, with Special Reference to the Physical Education of Girls publiziert.

Eerscht no ne baar Johr het si finanziälle Erfolg dur zfrideni Paziänte un dur d Ufmerksamkait vu dr Prässe yygstellt. Zäme mit ihre Schweschter Emily un dr Marie Zakrzewska het si 1857 e „Universitetsspital“ ufböue, wu si drei Dekterne d Megligkait het welle gee, ne Uusbildig zur Dokteri z mache, ohni ass si d Schikane vum Studium an ere „Manneuniversitet“ hän mieße dole – s Women's Medical College of the New York Infirmary isch uf d Wält chuu. Go Ruefschädigige vu dr bi ihre uusbildete Dekterne verhindere, isch d Blackwell uf seli stränge Zuelossigsexame un Abschlussbriefige bstande. D Uusbildig isch rigeros gsii un d Studäntine hän e yywandfreii Morla mieße vorwyse, sunscht sin si vum Studium uusgschlosse wore.

Anne 1869 het d Elizabeth Blackwell ihre Spital ihrne Noofolgerne iberloo un isch retuur gange in s Verainigt Chenigrych, wu si 1871 d National Health Society grindet het - dr Vorlaifer vum hitige britische National Health Service (NHS, s nazional Gsundhaitssischtem). Zäme mit dr Florence Nightingale het si an dr London School of Medicine for Women Chrankeschweschtere un Dekterne uusbildet. Ab 1875 het si d Blackwell nodno us dr Praxis zruggzoge, het aber als no Biecher schribe. Si isch Ändi Mai 1910 z Schottland gstorbe.

Ehrige[ändere | Quälltäxt bearbeite]

Si het Yygang in di bildend Chunscht vum 20. Johrhundert gfunde. Di feministisch Chinschtleri Judy Chicago het ere in ihre Arbet The Dinner Party ais vu dr 39 Gedeck am Disch gwidmet.[2]

Literatur[ändere | Quälltäxt bearbeite]

  • Elizabeth Blackwell, Amy Sue Bix, Pioneer Work in Opening the Medical Profession to Women: Autobiographical Sketches. Humanity Books, 2005. ISBN 1-59102-255-X
  • Adele Glimm, Elizabeth Blackwell: First Woman Doctor to Modern Times. McGraw-Hill Education, 2000. ISBN 0-07-134335-0

Weblink[ändere | Quälltäxt bearbeite]

Fueßnote[ändere | Quälltäxt bearbeite]

  1. 1,0 1,1 Antonius Lux (Hrsg.): Große Frauen der Weltgeschichte. 1000 Biographien in Wort und Bild. Sebastian Lux Verlag, München 1963, S. 67.
  2. Elizabeth A. Sackler Center for Feminist Art: The Dinner Party. Brooklyn Museum, 2007-04-13. Abgrüeft am 2014-04-24. (en)
Information icon.svg Dä Artikel basiert uff ere fräie Übersetzig vu dere Version vum Artikel „Elizabeth_Blackwell_(Medizinerin)“ vu de dütsche Wikipedia.

E Liste vu de Autore un Versione isch do z finde.