Elisabeth Schnell (Moderatoori)

d Elisabeth Schnell (2011)

D Elisabeth Schnell (* 22. Jänner 1930 z Züri; † 1. Februar 2020 z Louene) isch e Schwyzer Schauspiileri, Raadiomoderatoori un Autoori gsii.

Lääbe

D Elisabeth Schnell isch in dr Altstadt vu Züri ufgwagse, wu iri Eltere Eduard Schnell un Maria Schnell geb. Schär, wie scho iri Grooßeltere, Päächter im Zumfthuus Schmide gsii sin. Noch em Abschluss vu dr Handelsschuel het si unter anderem bi dr Ellen Widmann, em Adolf Manz un em Hermann Wlach Schauspiil gleert.

Iri Schauspiilkarriere het anne 1948/1949 am Stadttheater Lozärn im „Summernachtsdraum“ in dr Roll vu dr Hermia aagfange, speeter het si z Stadttheater Khuur, bim Summertheater Winterthur un im Schauspiilhuus Züri gspiilt, wu si Statischti gsii isch un chlaineri Rolle ibernuu het. Si isch au mit s César Keisers Cabaret «Kikeriki» im Kom(m)ödchen z Düsseldorf ufdrätte.

Go Gäld verdiene het Elisabeth Schnell as Raiselaiteri gschafft, het Hind baadet un Manuskripte abtippt, speeter isch si uf Stuudieraise z Minche un z Rom, wu si unter anderem au Daarstelleri in Fotoromanzi gsii isch. No ire Ruggcheer in d Schwyz 1954 het si Rolle unter anderem i de Mundartfilm Uli der Knecht un Oberstadtgass ibernuu.

Anne 1954 het si bim Schwyzer Radio Beromünster in dr Abdailig Unterhaltig aagfange, wu si fir fimf Franke Stundeloon as Aasaageri gschafft het. Speeter het si aigeni Sändige gstaltet wie di eerscht reegelmääßig Sändig fir alti Lyt am Schwyzer Raadio Kafichränzli, Espresso, Im Auto durch die Schweiz, dailwyys zäme mit em Ueli Beck. Si het as Erfinderi vu dr bekannte Sändig Nachtexpress gulte, wu am 4. Juli 1969 zum eerschte Mool uf Sändig gangen isch. Im Volksmund het mer ere au als «Frau Beromünster» gsait. Dernääbe si im Fäärnsee Schweizerwandern un d Wynäächtssändig an Haili Oobe moderiert. In dr Sändig Ratatouille mit em Raoul Bärlocher isch si di eerscht Quizmasteri vum Schwyzer Fäärnsee gsii.

Nääben ire Aarbet bim Raadio het d Elisabeth Schnell all Ritt uf dr Biini gstande. Anne 1990 isch si friepänsioniert woore. Dodermit het si mee Theater chenne spiile. Vylmoll isch si in Musical un Luschtspiil vum Hans Gmür ufdrätte, zäme mit em Erich Vock, em Ruedi Walter un em Ueli Beck. D Elisabeth Schnell het au zum Ensemble vu dr Chliine Niderdorfopere gheert. In dr Sändig Sinerzyt vu dr DRS Musikwelle het mer si a´au as Moderatoori no chenne heere.

D Elisabeth Schnell isch leedig gsii un het z Züri gwoont. In ire Freizyt het si gäärn glääse un isch in dr Geegnig vu ire Feerinewoonig im Bärner Ooberland go wandere gange. Si isch chuurz no irem 90. Gebuurtsdaag noch ere lengere Chranket im Bärner Ooberland gstoorbe.

Wäärch

• En Augeblick bitte! Müller Marketing & Druck, Gstaad 2011, ISBN 978-3-907041-43-7.
  • En Augeblick bitte! 20 Kolumnen aus dem Alltag, gelesen von Elisabeth Schnell, mit Zwischenmusik von Daniel Gfeller. 2011, ISBN 978-3-03776-493-0.
• Heute schon gelesen? Müller Marketing & Druck, Gstaad 2012, ISBN 978-3-907041-51-2.

Literatur

• Thomas Blubacher: Elisabeth Schnell. In: Andreas Kotte (Hrsg.): Theaterlexikon der Schweiz. Band 3. Chronos, Zürich 2005, ISBN 3-0340-0715-9, S. 1625 f.
• Michael Gautier: Elisabeth Schnell. In: Historisches Lexikon vo dr Schwiiz.

Weblink

• Websyte vu dr Elisabeth Schnell.
• Elisabeth Schnell in dr Internet Movie Database.
• Radiolegende Elisabeth Schnell. Ein DRS-Flaggschiff für Generationen, uf srf.ch, 20. Jänner 2020.

Fueßnote

Dä Artikel basiert uff ere fräie Übersetzig vu dere Version vum Artikel „Elisabeth_Schnell_(Moderatorin)“ vu de dütsche Wikipedia. E Liste vu de Autore un Versione isch do z finde.