Eliana Burki

d Eliana Burki bim Festival Bardentreffen z Nürnberg 2009

D Eliana Burki (* 13. Septämber 1983 z Fäubrunne, Kanton Soledurn) isch e Schwyzer Musikeri. Si bruucht dr Uusdruck „Funky Swiss Alphorn“ fir s Alphorn in Funk-, Pop- un Jazz-Lieder.

Lääbe

D Eliana Burki spiilt Alphorn, syter ass si sechs Johr alt isch. Ain vu ihre erschte effetlige Ufdritt het si ass Nyynjehrigi am nordweschtschwyzerische Jodlerfescht z Schönewerd ghaa. Wel ere s draditionäll Due um s Alphorn nit gfalle het, het si nit in ere Draacht gspiilt, wie s sunscht gängig gsii isch. As Teenager het si ihri Vorlieb fir Blues- un Jazz-Kompositionen entdeckt.

Mit 16 Johr het si ihri Uusbildig zur Diermedizinische Fachaagstellte (TPA) abbroche. Si het Klavier un Gsang an dr Basler Musikhochschule studiert, wel s kai Fächer mit em Alphorn gee het. Zwischedure het d Burki als mit verschidene Orcheschter klassischi Alphorn-Konzärt as Solischti gspiilt.

Näben ihre Arbet as Musikeri schafft d Eliana Burki in ere Chinderklinik z Tafaas as freii Musiktheraputi. Mit ihrem Alphorn-Unterricht hilft si Chinder, wu an Mukoviszidose lyyde. D Schnuuftächnik, wu si bruucht, isch fir d Chinder hailsam.

D Eliana un ihri Band wäre wältwyt buecht fir Ufdritt. Bsunderi Ufdritt het si ghaa bi dr Mannschaftsuuslosig zue dr Euro 2008 un as Botschafteri fir schwyzerischi Musik ghaa. Anne 2007 isch ihri CD Heartbeat uusechuu, wu mit em David Richards in dr Mountain Studios produziert woren isch. Anne 2011 isch s Album Travellin’ Root uusechuu, produziert vum John Boylan.

D Eliana Burki läbt z Soledurn un z Los Angeles.

Weblink

 Commons: Eliana Burki – Sammlig vo Multimediadateie

• Websyte vu dr Eliana Burki
• Diskografy uf hitparade.ch

Fueßnote

Dä Artikel basiert uff ere fräie Übersetzig vu dere Version vum Artikel „Eliana_Burki“ vu de dütsche Wikipedia. E Liste vu de Autore un Versione isch do z finde.