Ehud Olmert

Us der alemannische Wikipedia, der freie Dialäkt-Enzyklopedy
Hops zue: Navigation, Suech
Dr Ehud Olmert 2009

Dr Ehud Olmert (hebräisch ‏אהוד אולמרט‎; * 30. Septämber 1945 z Binjamina, Israel) isch en israelische Politiker (Kadima) und isch vo 2006 bis 2009 Brömieeminister gsi.

Karriere[ändere | Quälltäxt bearbeite]

As Mitgliid vom Likud[ändere | Quälltäxt bearbeite]

Dr Olmert isch 1973 für e Likud in die acht Knesset gweelt worde und isch vo denn aa siibemol widergweelt worde. Under em Jitzhak Schamir isch er Gsundhäitsminister worde und het Reforme im Gesundhäitswääse gmacht. 1993 isch er zum Bürgermäister vo Jerusalem gweelt worde. As sonige het er jeedi Däilig vo Jerusalem kategorisch abgleent. 2003 isch er Minister für Industrii und Handel und Stellverdräter vom Ministerbresidänt worde (16. Knesset, 30. Regierig). Vom 29. Septämber 2003 aa isch er au Kommunikazionsminister gsi. In dere Funkzion het er de Scharon-Blaan understützt, wo noch em Israel sich äisitig us Däil vo de bsetzte Gebiet wurd zruggzie. Wie dr Scharon het er d Ideologii vom ene Groossisrael ufgee. Wo dr Netanjahu as Finanzminister zruggdrätte isch, het er au däm si Boste übernoo.

As Mitgliid vo Kadima[ändere | Quälltäxt bearbeite]

Er het dr Likud verloo, und isch zum Scharon sinere nöigründete Bardei Kadima gange. Wo dr Ariel Scharon e schwere Schlaagaafall überchoo het, het er as stellverdrätende Brömieeminister d Amtsgschäft witer gfüert, het mit Kadima d Waale vo 2006 gwunne und isch im April 2006 Ministerbresidänt vo Israel worde. Noch em zwäite Libanonchrieg het em d Winograd-Kommission Feeler und Versääge vorgworfe, er isch aber nid zruggdräte. Vom 18.Januar 2008 bis 13. April 2008 isch er au Minister für strategischi Ufkläärig gsi.

Dr Korruptionsskandal[ändere | Quälltäxt bearbeite]

Am 21. Septämber 2008 het dr Olmert in dr Middi vom ene Korrupzionsskandal si Rückdritt as Ministerbresidänt erkläärt, won er scho im Juli aakündigt het. Er isch, bis dr Benjamin Netanjahu am 31. März 2009 e nöiji Regierig bildet het, im Amt bliibe.

Am Aafang vom Juli 2012 isch er wäge Undröiji vom ene Gricht z Tel Aviv schuldig gsproche worde und isch dr erst früeneri israelischi Regierigsschef gsi, wo verurdäilt worde isch. Im Mai 2014 isch er wäge dr «Holyland»-Affääre zu säggs Joor Gfängnis verurdäilt worde. Im Februar 2016 het er d Haftstrof aaträtte.

Brivats[ändere | Quälltäxt bearbeite]

Dr Olmert isch mit dr Künstlere Aliza Olmert, wo mit dr israelische Friidensbewegig sümpatisiert, verhürootet und het vier Chinder.

Weblingg[ändere | Quälltäxt bearbeite]

 Commons: Ehud Olmert – Sammlig vo Multimediadateie

Fuessnoote[ändere | Quälltäxt bearbeite]