Diskussion:Richard Gäng

Artikel vu dr Wuche? Hm...

Es isch e Fettnapf gstande, ganz chlei, nit gross<br(> doch mer duet ihn finde, wieso immer bloss?

Déjà vu. Burte un kei End? Nit degege, wenn es so Artikel git, aber muess mer so ebbis au noch zum Artikel vu dr Wuche mache? Er isch nit enzyklopädisch, er isch Theorifindig un unneutral.

S'Kapitel "Dr Gäng as Dichter" isch jo wohl e Gedichtinterpretation! Isch des e Ufsatz iber Lyrik, oder sin mir do e Enzyklopaedi? Un es isch jo au nit eso, ass die logisch Schlussfolgerig uf dr Hand lit, wie wenn mer us Ussag vu dr Art: "Hund sin Sügedierer", "Sügedierer sin Wirbeldierer" folgeret, as no gelte muess "Hund sin Wirbeldierer" - säll isch jo kei Theorifindig, sundern ex definitione zwingend logisch. Bi Lyrik un Asichte isch so ebbis nit zwingend wie us naturwisseschaftliche oder mathematische Ussage.

Es goht aber witter: "In sinem Gedicht „Mi Muettersproch“ zeigt er, ass diä Sproch fir ihne voll vu Läbe isch", so, was bitte sott des si, wenn nit Theorifindig in Reinform? Es isch e Interpretation, wo mer so in ere Enzyklopädi eifach nit formmuliere cha. Des isch kei neutrali Wertig, des isch e Hommage.

oder witter obe: "Dr Gäng Richard isch mit Liideschaft fir d alemannisch Sproch idrätte – dr het gsähne, ass si mit dr moderne Gsellschaftsentwicklig an Diäfi un Breiti verliärt."

Aha. Müesst dr Satz nooch em Gedankestrich nit eher heisse: "dr het glaubt, ass si mit dr moderne Gsellschaftsentwicklig an Diefi un Breiti verlör" - es wird jo witter unte immerhi mit Zitate belegt? Alemannisch mag zwar bi dr Tempora verarmt si, aber bim Modus vum Verb isch es säll wohl nit. Do ghert e Konjunktiv ani, kei Indikativ.

Oder, au nit grad neutral: "Dr Gäng Richard isch Mitgliid vu dr NSDAP gsii; vu Lehrer het mer des verwartet; e Weigerig wär, wiä dr Fall Elisabeth Walter zeigt, uf große Argwohn gstoße"

So ebbis wär minere Meinig noch leidlich neutral: "Dr Gäng Richard isch - wie die meischte Lehrer im Dritte Riich - Mitgliid vu dr NSDAP gsii."

Dr nächscht Halbsatz isch e Rechtfertigung, wo nit in dr Artikel ghört: "E Weigerig wär, wiä dr Fall Elisabeth Walter zeigt, uf große Argwohn gstoße" - Was soll so e Satz? Sott do ebbis verniedlicht werre? Es macht neigierig. Wenn isch er denn in d'Partei iträtte? Vor 1933? gli im Friehjohr 1933 oder erscht im Spotjohr oder gar erscht im Johr druf oder noch später? So ebbis sait wohl doch meh iber d'Gsinnig us wie sälle Näbesatz. Un no natürlich derf nit ebber us ere vu dr Nazis verfolgte Minderheit fähle as Beleg, as dr Gäng numme e widerwillige Mitläufer gsi sei. Aber was sait säll scho us? Nit, denn was müesst mer suscht us dem Fall schliesse? Ich will gar nit iber dr Gäng dr Stab breche, aber e Amerkig wie: "Dr Gäng isch wie die meischte Lehrer in Ditschland in sällere Zit Mitglid vu dr NSDAP gsi. Er isch im ..... in d'Partei iträtte." reicht doch wohl vollkomme us, so lang er nit stärcher in politische Erschinig trätte isch. Un dass er sich mit dr lokale Adölfli villicht iberworfe het, muess nit ideologischi Gründ gha ha. Sonigi Strittereie git's iberall. Es sait gar nit driber us, was mer vum Adolf haltet, wemmer sich mit dr Adölfli strittet.

Naja, sei's drum. Irgendwie hani au bi minere Replik e déjà vu, wenn i si so liis. --W-j-s 00:17, 9. Feb. 2010 (MEZ)

Oje, good des jetz wider loos ... Du muesch nid glyy au no geg dr Autor schdùbfle. Du hädsch au aifach die Passaasche chenne korrigiere, d Wikipedia isch e Wiki, d. h. ejeede chaa verbessere ùn ändere. --Holder 06:13, 9. Feb. 2010 (MEZ)

Ich nominier jo nit zum Artikel vu dr Wuche. Bi Artikel, wo NSDAP, Burte o.ä. drin stehn sott mer villicht noch uf eweng meh wie uf dr Sprochstil achte ;-) Ich hab e baar Formalie koorigiert: Dr Burts- und dr Dodesdag ghöre jo gli näbe dr Namme. Dr Rescht isch e Gratwanderig. Mer muess es jo nit so sähe wie i, oder? Villicht bi i bi dem Thema jo au eweng iberempfindlich un iberkorrekt? --W-j-s 20:03, 9. Feb. 2010 (MEZ)

Mi nimmt s wunder öb das 'unsere' Richard Gäng isch, wo das do gschriibe het: Deine Familie : Anleitung zur Sippen- und Ahnenkunde mit grundsätzlichen Betrachtungen geschrieben von Richard Gäng. Publisher: Bühl-Baden : Konkordia, [1937] und was din gschriiben isch. I ha s in ere Liste vo dr Uni Berkeley gfunde. Numen e Mitläufer oder doch ein vo de Frösch im Nazi Sumpf? Einzelbispil, wo entlaste, wie s im Ardikel vorchunnt, si immer e chlii suspäkt. Me kennt jo dr Spruch «E baar vo miine beste Fründ si Juude». Uf dr andere Siite isch s immer schwiirig und hüfig ungrächt im noochiine z verurdeile. So schlimm wie d Nazi in de 30er Johr au gsi si, dr Normalbürger het sich kuum chönne vorstelle, wie s emol uusechiem. Andi d 11:33, 10. Feb. 2010 (MEZ)

Noch em KVK-Bibliothekskatalog isch des dr glyych, leider git s des Buech niene in myyre Ryychwyti, mer mießt emol dryyluege, was er dert gschribe het. --Holder 12:47, 10. Feb. 2010 (MEZ)

Ja, so langsam miesst mer echt emol drini luege, was säll Werch iber Genealogi agoht. Vor allem die grundsätzliche Betrachtige dürfte uffschlussriich si. Ab 15. Auguscht 2014 cha mer ibrigens im Gäng si NS-Mitgliderakte im Bundesarchiv isähne. Säll Genealogi-Werch isch scho emol hochverdächtig. Was fier Kuckuckseier finde sich noch in dr alemannische Wikipedia? Un es het hoffetlich niemed ebbis degege, aber "Bewusster Alemann" setz i im Artikel jetz emol in Afüehrigszeiche. S'Genealogi-Werch ghört eigetlich au bi im Gäng sinem Schaffe ufgfüehrt - jedefalls dann, wenn üs dr Inhalt bechannt isch. --W-j-s 17:48, 10. Feb. 2010 (MEZ)

Ich hoff jo, ass mer scho vor em 15. Augschte 2014 meh wisse ... Wieso wird d Mitgliderakte eigetli grad an däm Dag frej, was isch do? --Holder 18:17, 10. Feb. 2010 (MEZ)

Mitgliderakte vu NS-Mitglider werre im Bundesarchib 30 Johr noch ihrem Dot allgemein zuegänglich, was bim Gäng in vierehalb Johr no so witt isch, wenn si Dodesdatum stimmt (in menke Quelle im Internet isch nämlig 1983 as Dodesdatum agä, aber i nimm a, 15.8.1984 isch korrekt), falls des dert stimmt: --W-j-s 18:31, 10. Feb. 2010 (MEZ)

Ich frog, wel im Artikel dr 10. Auguscht 1984 as Dodesdatum stoht. --Holder 18:34, 10. Feb. 2010 (MEZ)

ups. ;-) --W-j-s 18:40, 10. Feb. 2010 (MEZ)

Dää Artikel in dr Badische isch au ender harmlos. --Holder 18:41, 10. Feb. 2010 (MEZ)

In dr Badische stoht aber ass am 10. Auguscht 1983 gstorbe sei. D'NS-Zit wird komplett usblendet. D'BZ isch im Regionaldeil scho immer "bodeständig" gsi... --W-j-s 18:57, 10. Feb. 2010 (MEZ)

No Uuschumft vu dr Friedel Scheer-Nahor, dr Gschäftsfiereri vu dr Muettersproch-Gsellschaft isch dr Gäng 1983 gstorbe. Im Heftli "Alemannisch dunkt üs guet" vu dr Muettersproch isch in dr Uusgab III/IV 1983 e Nooruef uf dr Gäng din gsi. --Holder 16:25, 11. Feb. 2010 (MEZ)

In d Bardei yydrätte 1933, 1942-44 Kreiskulturhauptstellenleiter z Fryybeg, no 1945 zerscht vum Dienscht suspendiert, derno as "minderbelast" yygstuft. Schyns e typische Mitlaifer, wie s Millione gee het, villicht nit iberzygt, aber s Syschtem schyns mitdrait bis zlescht ... --Holder 17:10, 13. Feb. 2010 (MEZ)

Ich glaub, noch allem, was du do recherchiert hesch, cha mer bi 'villicht nit iberzygt' säll 'villicht nit' ussistriche. --W-j-s 20:42, 14. Feb. 2010 (MEZ)

Noch e chleine Nochtrag: E blosse Mitlaifer wird nit Kreiskulturhauptstellenleiter vu dr NSDAP. Also dr 1. April isch geschtern gsi. Des ganz agäblich entlaschtends Material iber dr Geng gehrt mMn ussem Artikel rus. Es isch nochträglichi Schönfärberei. Was des minderbelaschtet agoht: Ich ha deheim e Dokument vorlige, worus ich schliesse cha, dass zimlig vili so e Persilschin kriegt hän, wo ihn nit verdient gha hän. Minderbelaschtet sait gar nit. Kreiskulturhauptstellenleiter degege sait zimli vil. --W-j-s 14:03, 2. Apr. 2010 (MESZ)

Was isch iberhaupt e "Kreiskulturhauptstellenleiter"? Was het dää fir e Funktion gha (un sag jetz nit, er isch dr Leiter vu dr "Kreiskulturhauptstelle" gsi ;-))? --Holder 14:20, 2. Apr. 2010 (MESZ)

"Kreiskulturhauptstellenleiter" isch schins e Parteiamt vu dr NSDAP gsi - es git nit vil Treffer bi Google dezue, aber sälli wänige erwähne es in dr Regel mit "Kreishauptstellenleiter der NSDAP". S'Landesarchiv vu BW, wo meh dezue het, isch numme gege Geld iluegbar (was minere Meinig nooch kriminelle Amtsmissbruch isch, aber säll isch e anders Kapitel, wo irgendwenn Google löse wird). Trotz ere düftige Quellelag gang i devu us, dass d'Kreiskulturhauptstelle gluegt het, dass dr Kulturbetrib uf Linie blibe isch. Die Interpretation erklärt au s'Beruefsverbot vum Gäng noch em Krieg. So ebbis hän Mitlaifer nit griegt. Der Mann isch e typische kleine Nazi gsi. Dass er nit immer mit allem d'accord gange isch, widerspricht dem nit. Mer het erscht emol nit e Parteiamt griegt - noch dezue im e Beriich, wo im Goebbels understande isch - wemmer nit uf Linie gläge isch. Wenn doch, so brücht's defir Belege. --W-j-s 15:28, 13. Jan. 2011 (MEZ)

Artikel vu dr Wuche

Emol e grundsätzlichi Frog: Wie het es der Artikel eigetlich zum "Artikel vu dr Wuche" gschafft? Was sin do d'Uswahlkriterie gsi? Wie isch er nominiert worre? Wo cha mer eigetlich d'Nominierige fier die nächschte Wuche finde? Mit Vorlage_Diskussion:Houptsyte/Artikel_der_Woche cha ich nit vil afange, do stehn keini Date drin, wenn so Artikel no uf d'Hauptsite sott, wohl aber sin au Artikel drin, wo ich dr Hauptautor bi. Ich dät so Artikel, wenn si vu mir sin, scho gern emol rechtzitig durchluege, bevor is prominent platziert werre. --W-j-s 20:42, 14. Feb. 2010 (MEZ)

Sälli Syte isch di einzig Syte, wu s derzue git. Us däre Lischt suecht i. d. R. dr Chlämens e Artikel uus, sunscht git s kei Nominierige oder Wahle. Ejede cha sälber Artikel derzue setze oder Artikel uusneh, wun er meint si ghere do nit dryy. Di einzig Bedingig derfir, ass e Artikel uusgwehlt wird us däre Lischt, isch, ass es e Bild din het. Im Ibrige "Artikel vu dr Wuche" heißt nit, ass dr Artikel exzellänt mueß syy oder ass er iber e nätt Thema oder iber e sympatischi Person mueß syy. Un no dr Ergänzige un Korrekture, find i, cha mer dää Artikel erscht emol loo, un wänn nit cha mer allno dr Vorlag {{Überarbeiten}} dryysetze.

PS: Uf dr Änglische Wikipedia isch s au ei einzige Autor, wu dr Artikel vum Dag uuswehlt, ohni Wahle. --Holder 20:54, 14. Feb. 2010 (MEZ)

Aktuelli Theme (menki Sache bi Astronomi, aber au vor allem Date bi Ortsartikel) veralte mit dr Zit. Ich hab in dere Wikipedia so vil Artikel gschribe, dass es mir nit möglich isch, die alli au aktuell z'halte, sällewäg die Frog. --W-j-s 22:31, 14. Feb. 2010 (MEZ)

wer recherchiert?

30 Johr sin sit geschtert um. Ich kenn ebber, wo i emol froge cha, mir z'helfe iber dr Gäng z'recherchiere. Mol luege, was i rus find. --W-j-s (Diskussion) 23:22, 11. Aug. 2013 (MESZ)

Do bin i mol gspanne, was do in ere sonige Akte din stoot. --Holder (Diskussion) 21:23, 12. Aug. 2013 (MESZ)