Die Hochzeit des Jobs

Wärkdaate
Originalditel:	Die Hochzeit des Jobs
Form:	Sengschbiil
Originalsprooch:	Deutsch
Muusig:	Joseph Haas
Libretto:	Ludwig Andersen
Literarischi Vorlaag:	Erzehlong vom Carl Arnold Kortum
Uruffüerig:	2. Juli 1944
Ort vo dr Uruffüerig:	Dresden
Lengi vo dr Opere:	3 Stond
Ort und Zit vo dr Handlig:	Siddeitscha Universideetsstadt om s Jôhr 1800 rom

Dialäkt: Schwäbisch

Dr Joseph Haas, dr Kombonischt vo dera Opr, uff-ma Fodole us-em Herderlexikoo vo 1931

Die Hochzeit des Jobs ischt a deitscha Komischa Opr en viir Uffziig (acht Bilder) vom Kombonischda Joseph Haas (1879 bis 1960) us-em boirischa Schwôbalendle. S Libreddo stammt vom Ludwig Andersen (1883 bis 1978), wo mit-em birgerlicha Nama Ludwig Strecker ghoißa hôt, ond gôht zruck uff dui satirischa Erzehlong Leben, Meynungen und Thaten von Hieronymus Jobs dem Kandidaten, und wie er sich weiland viel Ruhm erwarb und auch endlich als Nachtwächter zu Sulzburg starb, wo em 18. Jôhrhondert vom Bochumer Arzt Carl Arnold Kortum (1745 bis 1824) vrfasst wôrra ischt. Zom erschda Môl uff d Bihne komma isch dui Opr am 2. Juli 1944 en dr Sächsischa Staatsopr z Dresden (heit: Semperoper). A Uffihrong dauret rond drei Stond.

D Persona vo dr Handlong ond ihre Stemmlaga

• Dr Hironymus Jobs (Bariton)
• S Käthle (Sopran)
• Dr Abodeker, wo gleichzeidich au Birgermoischtr ischt (Bassbuffo)
• Em Käthle ihr Mueder, d Wirdin vo-ra Studendaboiz (Mezzosopran)
• Dr Jakob, a Nachtwächter (Tenorbuffo)
• D Babe, sei Weib (Alt)
• Dr Tischler (Bass)
• Dr Dekan vo dr jurischdischa Fakuldeet (Bass)
• Zwoi Studenda (Tenor ond Bass)
• Zwoi Ratsherra (Tenor ond Bariton)
• Dr Nodar (Schbrechroll)
• Dr Hofmarschall (Schbrechroll)
• A Ratsdiiner (Schbrechroll)
• Mehrere Professora, Ratsherra, Studenda ond Volk (gemischder Chor ond Mennerchor)
• Em virda Akt kô au noh a Ballett eigfiigt wärra, wo an Volksdanz vorfihrt, sofern des Theater ibr a Balletttrubbe vrfiagt. Des ischt abr vom Kombonischda freigschdellt.

Firs Orkeschtr braucht-ma

Jeweils zwoi Fleeda, Oboa, Klarinedda ond Fagodd, viir Herner, drei Trombeeda, drei Posauna, a Basstuba, a grauß Schlagwerk, a Harf ond Streicher

Handlong

Ort ond Zeit

Dui Opr schbiilt en irgendoira (net näher beschdemmda) siddeitscha Universideetsstadt so oms Jôhr 1800 rom.

Ond dô drom gôht’s en deam Werk

Dr Jurastudent Hironymus Jobs fellt bei seim Exama mit Pauka ond Trombeeda durch, obwohl’r sich arg bemihat hôt, seine Priafer mit-ra Lekzioo ibr-na guada Gerichtsbarkeit, wia er sich dui vorstelle dät, zo beeidrucka. Drhoim wuud’r scho vo seira kinfdiga Schwiigrmuader, dr Wirdin vo dr Studendaboiz «Zum guten Lenchen», ond vo dera ihrem Dechterle Käthe, erwardet. S geit abr nomôl ebbr, wo uff de sell a Aug gworfa hôt: dr Birgermoischtr vo dera Stadt, wo gleichzeidig au noh dr Abodeeker ischt. Der Kerle probiirt mit äller Gwalt, d Heirat vom Hironymus mit-em Käthle zo hentrtreiba. Mit oolaudere Middl schafft’r’s au, d Wirdin en a Schuld vo 1.000 Taler zo vrstricka. Ond ehnlich vrfehrt’r mit-em Hironymus, auf dass deam nix Andrs meh ibrig bleibt, wia dui Nachtwächderstell, wo grad frei wôrra ischt, ôôznemmet, om seine Schulda tilga zo kenna. Dô driber naus muaß’r noh hoch ond heilich vrschbrecha, d Witwe vom frisch vrstorbena alda Nachtwächter zo heirada. Dr sell abr wacht aus seim Todesschlôf auf ond ischt wiidr putzmondr. Des Schlôfmiddl, wo-nr vom Abodeeker vrpasst kriagt hôt, ischt halt doch et stark gnuag gwäa. Nôch-ra alda Gwohnheit tutet dr Nachtwächter Jakob en sei Horn. Wia des dr Jobs heert, gôht’r zo-nem nôô ond ibrredet-en, mit a baar Studenda, wo grad vrbeikommet, ens nächschde Wirtshaus zom Saufa zo ganga. Ond des lôôt sich dr Jakob et zwoimôl saga. Dr Jobs abr duat weidrhin sein Dinscht als Nachtwächter. Weil’r enzwischa gmerkt hôt, was fir a Lomp dr Abodeeker ischt ond was’r em Schild fihrt, will’r sich jetzt an-em räächa.

Fir da „vrschdorbena” Nachtwächter organisiirt dr Jobs schnell a Scheinbegräbnis. Kaum isch des rom, vrkindet dr Birgermoischtr, dass jetzt dr Zeitpunkt komma wär, wo dr Jobs dui Nachtwächters-Witwe heirada miaßt. Dô kommet en-ra weinseliga Laune dia Studenda drher ond traget an alda Schrank schbaziira. Wia-se dean abstellet, effnet sich dui Tiir ond raus steigt sternhaglblau – dr alde Nachtwächter. Wia jetzt dr Jobs dui Bscheißerei vom Stadtobrhaupt effentlich macha will, biadet-em dr sell 1.000 Taler zor Deckong vo seim Schuldschei ôô. Uff oimôl daucht uff dr Bihne a Hofmarschall auf ond sait, er dät em Ufftrag vom Regenda komma. Dr Landesherr häb sei Red, wo-nr vor dr Prafongskommissio ghalda häb, gleasa ond sei so begeischtret gwäa, dass sei Exama als bestanda gilt. Wenn’r Luscht häb, bei dr Regiirong a Stell als Berater ôôzotredda, nô wär’r herzlich willkomma.

Wia dr Jobs em Volk s Käthle als sei Braut vorstellt ond driber uffklärt, wia-nr om a Härle Hôôr vrhendra hôt kenna, dass dui d Frau vom Birgermoischtr wôrra ischt, suacht dr sell ondrem Glächder vo de Leit schnell s Weide.

Musik

Dui Opr hôt d Form vo-ma Sengschbiil, was hoißt, dass de oinzlne musikalische Doil wia Aria, Duett, Cheer ond so weidr durch gschbrochene Dialog mitnander vrbonda send. D Musik isch durchweg tonal ond melodisch. Drom schbricht-se au an Haufa Leit ôô, wo normalerweis mit dr moderna Musik et viil am Huat hend. Drom kôômr des Werk au em beschda Senn als „Volksoper” bezeichna.

Quell

• Hellmuth Steger + Karl Howe: Opernführer, Fischer Bücherei KG, Frankfurt am Main, 1954, s Daschabuach mit dr Nommer 49