Daniela Ryf

Us der alemannische Wikipedia, der freie Dialäkt-Enzyklopedy
D Daniela Ryf bim Ironman Germany z Frankfurt (2018)

D Daniela Ryf (* 29. Mai 1987 z Soledurn) isch e Schwiizer Triathletin und zwöifachi Olympiadeilnähmeri (2008, 2012). Sie isch U-23-Wäutmeisteri (2008), Wäutmeisteri im Mixed-Relay (2009, 2010) und Schwiizermeisteri uf de Triathlon-Churzdistanz (2012, 2013). Usserdäm het sie viermoou d Ironman 70.3 World Championship (Mitteldistanz: 2014, 2015, 2017, 2018) gwunne und isch viermalegi Siigeri vo dr Ironman World Championships (Langdistanz: 2015–2018). D Ryf wird als Füehrendi i de Besteliste vo de Schwizer Triathletinne uf dr Ironman-Distanz gfüehrt.

Wärdegang[ändere | Quälltäxt bearbeite]

Im Johr 2000 het d Daniela Ryf zerst Moou amene Schüelertriathlon deilgnoo. Sie isch denn drümoou Schwizermeisteri i dr Jugedkategorie worde. Bir Europameisterschaft 2003 het sie mit em Gwünn vo de Goldmedaille ir Teamwärtig ire erst internationau Erfoug gfyret.

Junioren-Europameisteri Triathlon 2004[ändere | Quälltäxt bearbeite]

2004 und 2005 sy zwöi witeri Juniore-Europameistertitu ir Einzuwärtig gfougt, 2006 isch e Bronzemedaille ir Teamwärtig dezue cho. Sie isch vom Claude Ammann (2000–2008), em Darren Smith (2008–09), em Chris Lang (2010) und em Craig Walton (2011) trainiert worde.[1]

Vo 2003 bis 2006 isch d Ryf viermoou z Foug Schwiizermeisteri bi de Juniorinne worde. Am 8. Juni 2008 het sie denn z Vancouver de Triathlon-Weltmeistertitu ir Kategorie U-23 ghout und sech demit für di Olympische Summerspüu 2008 z Peking qualifiziert, wo si de sibet Rang beläit het. 2009 het sie z Des Moines gmeinsam mit dr Magali Di Marco Messmer, em Ruedi Wild und em Lukas Salvisberg d Wäutmeisterschaft im Mixed Relay (Teamwärtig) gwunne und im Johr druf z Lausanne het sie de Titu im Schwiizer Team zäme mit de Nicola Spirig, em Ruedi Wild und em Sven Riederer erfougrych verteidiget und widerhout.

Olympischi Summerspüu 2012[ändere | Quälltäxt bearbeite]

Im Juni 2012 het sie sech ou fürne Start bi de Olympische Spüu 2012 z London qualifiziert, wo sie zäme mit de Nicola Spirig, em Sven Riederer und em Ruedi Wild für d Schwiiz gstartet isch und de 40. Rang erreicht het.[2] Im Septämber 2012 isch sie denn z Murte Schwiizermeisteri über di Olympischi Triathlon-Distanz worde.

D Daniela Ryf isch 2013 Mitglied vom Elite B-Kader im Swiss-Triathlon-Team gsi. Im Mai isch si im östrychische St. Pölten zerst Moou uf dr Ironman-Halbdistanz gstartet und im Ougust het sie z Wiesbaden dr Ironman 70.3 European Championship gwunne.[3]

D Daniela Ryf noch em Rönne ir World Championship Series z Madrid (2010)

Syt 2014 wird si vom Oustralier Brett Sutton (är coacht ou d Nicola Spirig; «Trainer vom Johr 2017») und vom früechere Velorönnfahrer Armin Meier betreut.[4]

Im Juni 2014 het si z Rapperswil-Jona bi irem Siig bim Ironman 70.3 Switzerland iri bishärigi Bestzyt uf de Mittudistanz erreicht. Ändi Juli het si z Züri d 5150 European Championship gwunne und grad am Tag druf bi irem erste Start uf de Langdistanz ou dr Ironman Switzerland gwunne. Dee Siig het ire ou die no fählende Pünkt im «Kona Pro Ranking System» vo de WTC brocht für ne Start drei Möned spöter bim Ironman Hawaii.

Im Septämber het si z Kanada d Ironman 70.3 World Championship gwunne. Füf Wuche spöter het si bir Ironman World Championship de zwöit Blatz beläit.[5] Vo de insgsamt 125.000 US$ Brysgäuder, wo d WTC im Johr 2014 usgschüttet hei, sy meh a d Daniela Ryf ggange weder a jedi angeri Triathletin bi de WTC-Wettkämpf.[6]

Siigeri Ironman Hawaii 2015[ändere | Quälltäxt bearbeite]

Syt Aafang vom Johr 2015 startet d Ryf s nöi ggründete Bahrain Elite Endurance Triathlon Team, wo vom Oustralier Chris McCormack gleitet wird.[7] Im Mai 2015 het si dr Ironman 70.3 Mallorca mit nöiem Streckerekord gwunne, das isch ire sächst Siig z Foug bimene Wettkampf uf dere Distanz gsi.

Im Juni het si z Frankfurt bi irem vierte Start bimene Wettkampf über d Ironman-Distanz d Ironman European Championship gwunne. Trotz extrem höche Temperature, wo für di höchsti Abbrächerquote ir Gschicht vo de Veraastautig gsorgt hei, het si de Streckerekord mit nöier persönlecher Bestzyt uf dere Distanz vo 8:51:00 h ungerbotte.

Im Ougste het si im Rahme vom Ironman 70.3 Zell am See-Kaprun d Ironman 70.3 World Championship gwunne. Im Oktober het d Ryf aus erst zwöiti Schwiizeri noch de sächsfache Siigeri Natascha Badmann dr Ironman Hawaii gwunne. Aus erst zwöiti Frou noch de Leanda Cave (2012) het se doodemit innert eim Kaländerjohr sowou d Ironman 70.3 World Championship und d Ironman World Championship für sech chönne entscheide.

Mit irem Siig uf de Mittudistanz z Bahrain im Dezämber 2015 het si ou d Gsamtwärtig vo de «Triple Crown Series» us em Challenge Dubai, dr Ironman 70.3 World Championship und em Ironman 70.3 Bahrain und demit das bis deet höchsti Brysgäut ir Gschicht vom Triathlon ir Höchi vo 1 Million US$ gwunne.[8]

Siigeri Challenge Roth und Ironman Hawaii 2016[ändere | Quälltäxt bearbeite]

D Daniela Ryf bim Challenge Roth (2016)

Im Juni 2016 het si zum dritte Moou z Foug dr Ironman 70.3 Switzerland chönne gwünne. Im Juli het si bim Challenge Roth mit irere Sigerzyt vo 8:22:04 h e persönlechi Bestzyt und di drittschnäusti Zyt gschafft, wo je vonere Frou uf dr Langdistanz ufgsteut worden isch. Nume e Wuche spöter isch si bir nächste Langdistanz gstartet und het dr Ironman Switzerland mit nöiem Streckerekord uf de nöie Streckefüehrig aalässlech vo de 20. Ustragig gwunne.

Im Oktober het si bim Ironman Hawaii de Streckerekord um meh aus füf Minute verbesseret und ire Titu bir Ironman World Championship erfougrych verteidiget.[9]

Siigeri Ironman Hawaii und Ironman 70.3 World Championship 2017[ändere | Quälltäxt bearbeite]

Im Juli 2017 het si ihren Erfolg beim Challenge Roth verteidiget. Im Septämber het si aus ersti Athletin zum scho dritte Moou noch 2014 und 2015 de Titu bir Ironman 70.3 World Championships ghout.

Im Oktober het si zum dritte Moou z Foug dr Ironman Hawaii gwunne. Noch em Schwümme isch si no mit 4:23 min Rückstang uf em achte Rang gläge, het sech aber mit em Velo i Füehrig brocht und het die au uf de Marathondistanz nümme abgäh.[10] Mit dene Erfoug isch d Daniela Ryf ir Saison 2017 di Athletin gsi, wo am meiste Gäut verdient het.[11]

Im Mai 2018 isch si zäme mit em Jan Frodeno und em Chris McCormack Mitglid vo de nöie Triathlon-Mannschaft vo Breitling worde.[12] Im Juli het si zum zwöite Moou noch 2015 bim Ironman Germany d Ironman European Championships mit nöiem Streckerekord für sech entscheide (8:38:44 h) und het s Ziil aus Sibti ir Gsamtwärtig erreicht.[13]

Vierte Siig bim Ironman Hawaii 2018[ändere | Quälltäxt bearbeite]

Im Oktober 2018 het die 31-Jöhregi zum vierte Moou z Foug dr Ironman Hawaii chönne gewünne.[14] D Daniela Ryf isch meh als nüün Minute nach de füehrende Lucy Charles us em Wasser cho, het aber d Britin gäg Ändi vo de Velostrecki no chönnen überhole. Si het mit dr nöie Bestzyt uf dr Ironman-Distanz vo 8:26:16 h e nöie Streckerekord bi de Froue uf Hawaii ygstöut und het deby ire bishärig Rekord us em Johr 2016 um meh aus 20 Minute ungerbotte.

D Daniela Ryf läbt z Fäubrunne-Santiklaus.

Uszeichnige[ändere | Quälltäxt bearbeite]

Weblink[ändere | Quälltäxt bearbeite]

 Commons: Daniela Ryf – Sammlig vo Multimediadateie

Einzunochwyse[ändere | Quälltäxt bearbeite]

  1. ↑ The New Chrissie (9. Mai 2015)
  2. ↑ 7 weitere Athleten für London selektioniert (Memento vom 17. Juni 2012 im Internet Archive)Memento7 weitere Athleten für London selektioniert (Memento vom 17. Juni 2012 im Internet Archive)
  3. ↑ Daniela Ryf mit EM-Gold (11. August 2013)
  4. ↑ Daniela Ryf: Im Training musst du dran bleiben, sonst ist man weg (7. Februar 2017)
  5. ↑ Daniela Ryf nur von Titelverteidigerin Carfrae besiegt (12. Oktober 2014)
  6. ↑ IRONMAN-Preisgeldkönige aus dem Jahr 2014 (3. Februar 2015)
  7. ↑ Bahrain Elite Endurance Triathlon Team. Archiviert vom Original am 25. August 2018; abgruefen am 16. Oktober 2018.
  8. ↑ Ironman 70.3 Bahrain: Ryf ist jetzt Triathlon-Millionärin
  9. ↑ Daniela Ryf: Auf den letzten zwei Kilometern bin ich gesprintet (8. Oktober 2016)
  10. ↑ Daniela Ryf gewinnt die Ironman-WM erneut (15. Oktober 2017)
  11. ↑ Ryf und Mola Triathlon Preisgeldkönige 2017 (24. Oktober 2016)
  12. ↑ Die Breitling Triathlon Squad (15. Mai 2018)
  13. ↑ Nur sechs Männer schneller als Daniela Ryf (9. Juli 2018)
  14. ↑ Ironman Hawaii mit Rekorden – Daniela Ryf holt sich vierten WM-Titel (14. Oktober 2018)
  15. ↑ Daniela Ryf ist Sportlerin des Jahres (Memento vom 22. Dezämber 2015 im Internet Archive) (13. Dezember 2015)
  16. ↑ Ironwoman Ryf holt sich den Titel vor Spirig (15. Dezember 2016)
  17. ↑ Ehrung für Daniela Ryf (Site cha nüme abgrüeft wärde; Suche im Webarchiv)[1] [2] Vorlage:Toter Link/danielaryf.ch
Dä Artikel basiert uff ere fräie Übersetzig vum Artikel „Daniela_Ryf“ vu de dütsche Wikipedia. E Liste vu de Autore un Versione isch do z finde.
Vun "https://als.wikipedia.org/w/index.php?title=Daniela_Ryf&oldid=980019"