Dagobert II.
| Dagobert II. | |
|---|---|
| König vo de Franke im Deilriich Austrasie | |
 Fantasiiportret vom Dagobert II. us em 16. Johrhundert | |
| Regierigsziit | 676 - 678 |
| Uf d Wält cho | 652 |
| Gstorbe | 23. Dezember 679 |
| Dodesort | bi Stenay |
| Begrabe | Chloster Stenay |
| Vorgänger | Chlodwig vo Austrasie |
| Nochfolger | Theuderich III. |
Dr Dagobert II. (* 652; † 23. Dezember 679 bi Stenay) stammt us em Gschlächt vo de Merowinger, dr erste Herrschaftsdynastii vo de Franke. Er isch zwüsche 676 und 679 König vo Austrasie gsi.
Dr Dagobert II. isch ohni Nochkomme gstorbe. Die modärni Legände vom ene Sohn, wo Sigibert IV. gheisse haig (676-758, "Le Plant-Ard", dr spöter Graf vo Razés und Vorfahr vom Gottfied vo Bouillon) het kei historischi Basis.
Scho won er erst vieri gsi isch, isch dr Dagobert dr Nochfolger vo siim Vater Sigibert III. as König vo Austrasie worde. Aber schon e Johr spöter het en dr pippinidisch Huusmeier Grimoald entfüehrt und en em Bischof Dido vo Poitiers averdraut, won en zum Mönch gweiht het. So het dr Grimoald si eignig Sohn, dr Childebertus adoptivus, chönne uf e Dron setze, nochdäm dä vom König Sigibert III., wo denn no kei Sohn gha het, adoptiert worden isch. Dr Dagobert isch in es Chloster z Irland in d Verbannig gschiggt worde, spöter isch er noch Ängland cho, won er am Königshof erzoge worden isch. Sit dere Ziit het en en ängi Fründschaft mit em Wilfrid vo York verbunde. Er haig die änglischi Prinzessin Mechtilde ghürotet. D Historiker dängge das siig ehnder zwiifelhaft.
Noch em Dod vom Childebertus adoptivus isch s Riich an dr Childerich II. gfalle. Er het vo 662 bis zu siim Dod im Johr 675 gregiert. Verschiideni austrasischi Grossi under em Huusmeier Wulfoald hai dr Dagobert im Johr 676 us Irland uf e Königsdron vo Austrasie zruggbrocht. Dr neustrisch Huusmeier Ebroin, e Gegner vom Pippin em Mittlere (öbbe 635-714), und e iiflussriiche Adlige, wo um d Herrschaft im Frankeriich grunge het, het dä Schritt ohni Erfolg bekämpft.
Dr Dagobert het s Regiere siim Huusmeier Pippin überlo. Er het sich nume um siini fromme Üebige und wohldätige Wärk kümmeret. Er het Chille lo baue und verschiideni Chlöster gründet, wie zum Bispil d Chlöster Surburg und Wisseburg im Elsass.
Grad wo d Kämpf zwüsche Austrasie und Neustrie usbroche gsi si, isch dr Dagobert am 23. Dezember 679 vom Huusmeier Ebroin und de Arnulfinger uf dr Jagd im Wald voWoëvre zwüsche Stenay an dr Maas und Verdun ermordet worde. Im Chloster Stenay isch dr ermordeti König begrabe und spöter as Märtyrer verehrt worde; spötistens sit 1068 isch dr Heilig Dagobert e Patron vo dr Chille, vor allem z Lothringe und im Elsass. D Chille Saint Dagobert isch währed dr französische Revolution 1789 zerstört worde und alli Reliquie usser em Schädel si verlore gange.
Rezeption
[ändere | Quälltäxt bearbeite]Z Frankriich isch no hüte e Spottlied (e contine) über "le bon Roi Dagobert" wiit verbreitet. Es stammt offebar us dr Ziit vo dr französische Revolution.
Weblingg
[ändere | Quälltäxt bearbeite]| Vorgänger Chlodwig vo Austrasie |
König vo de Franke im Deilriich Austrasie evtl. 656/657 beleit 676 - 678 |
Nochfolger Theuderich III. |