Theuderich III.

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen
Theuderich III.
König vo Neustrie
König vo de Franke
Theuderic III.jpg
Fantasiibild vom Theuderich III.
Regierigsziit 673 König vo Neustrie
675-691 König vo Neustrie
687 - 691 König vo de Franke
Uf d Wält cho wohrschiinlig 653
Gstorbe zwüschen em 2. September 690 und em 12. April 691
Begrabe in dr Chille Saint-Vaast z Arras
Vorgänger Chlothar III., Neustrie u. Burgund 673
Childerich II., Neustrie u. Burgund 675
Dagobert II., Austrasie 678
Dronfolg Lex Salica: Si eltist Sohn het gerbt.
Nochfolger Chlodwig III.
Verhürotet mit Chrodechild

Dr Theuderich III. (* wohrschiinlig 653; † zwüschen em 2. September 690 und em 12. April 691) isch im Johr 673 und denn vo 675 bis 691 e König vo de Franke us em Gschlächt vo de Merowinger gsi.

Läbe[ändere | Quälltäxt bearbeite]

Dr Huusmeier Ebroin het dr Theuderich III. 673 zum König lo usrüefe. Er het aber gege si Brueder Childerich II. vo Austrasie verlore, isch gschore und in d Abtei Saint-Denis verbannt worde. Noch em Childerich siim Dod 675 isch er wider as König iigsetzt worde. D Macht isch aber in de Händ vo de Huusmeier bliibe. Noch em Dod vom Dagobert II. vo Austrasie und vom Ebroin isch under em Theuderich zum erste Mol sit langem s ganze Frankeriich wider under eim Herrscher vereint gsi. In dr Schlacht bi Tertry het dr austrisch Huusmeier Pippin entscheidend gwunne; er isch eso dr Huusmeier vo alle Riichsdeil worde. Er isch als princeps francorum (dr Erst vo de Franke) dr mächtigst Ma im Riich gsi. Er het us rächtlige Gründ s merowingische Königdum bibhalte, dr Theuderich isch en Art Geisle gsi. Er het bis zu siim Dod bedütigslos z Neustrie gläbt. Er isch z Arras in dr Chille Saint-Vaast begrabe. Si Nochfolger as König isch si eltist Sohn Chlodwig III. worde.

Familie[ändere | Quälltäxt bearbeite]

Dr Theuderich III. isch dr zweit Sohn vom Chlodwig II. und vo däm siiner zweite Frau Bathilde und dr Brueder vo siim Vorgänger z Neustrie und im Burgund, em Chlothar III. Er isch mit dr Chrodechild (öbbe 660 bis noch em 5. Juni 692) verhürotet gsi. Si hai zwei Söhn, dr Chlodwig III. und dr Childebert III. gha.

Literatur[ändere | Quälltäxt bearbeite]

  • Bauer, Dieter R./Histand, Rudolf/Kasten, Brigitte/Lorenz, Sönke: Mönchtum - Kirche - Herrschaft 750-1000, Jan Thorbecke Verlag, Sigmaringen, 1998,
  • Felix Dahn: Die Völkerwanderung. Kaiser Verlag Klagenfurth 1997
  • Eugen Ewig: Die Merowinger und das Frankenreich. Verlag W. Kohlhammer Stuttgart Berlin Köln 1993
  • Riche, Pierre: Die Karolinger. Deutscher Taschenbuch Verlag München 1992
  • Rudolf Schieffer: Die Karolinger. Verlag W. Kohlhammer Stuttgart Berlin Köln 1997


Information icon.svg Dä Artikel basiert uff ere fräie Übersetzig vum Artikel „Theuderich_III.“ vu de dütsche Wikipedia. E Liste vu de Autore un Versione isch do z finde.