Arnulfinger

Us der alemannische Wikipedia, der freie Dialäkt-Enzyklopedy

D Arnulfinger si d Nochkomme vom Bischof Arnulf vo Metz, wo spöter heilig gsproche worden isch. Sie sind, zsämme mit de Pippinide, eini vo de dynastische Linie, wo zu de Karolinger gfüehrt hai.

D Macht vo de Arnulfinger isch dur s änge Bündnis zwüschen em Arnulf und em Pippin em Ältere entstande, wo beidi Füehrer vom austrasische Adel gsi si. Im Pippin si Dochter, d Begga, isch mit em Arnulf siim Sohn, em Ansegisel, verhürotet gsi. Dr Arnulf und dr Pippin der Ältere si d Afüehrer vo dr austrasische Adelsverschwörig gege d Königin Brunichild gsi.

Noch em abverheite Staatsstreich vom pippinidische Huusmeier Grimoald im Johr 661 isch d Macht, s Erb und die politische Ziil uf dr Sohn vom Ansegisel und dr Begga, uf e Pippin dr Mittler übergange. Noch siim Siig über e neustrisch Huusmeier Ebroin in dr Schlacht bi Tertry 687 het dr Pippin d Macht im merowingische Riich in siine Händ gha. Er het siine Söhn die wichdige Böste im Riich ge und eso si Herschaft befestigt: dr Grimoald dr Jüngeri isch öbbe 700 Huusmeier vo Neustrie worde, dr Drogo Dux in der Champagne. Dr Karl Martell, dr unehelig Sohn vom Pippin wird as dr Neugründer vo dr Dynastii agluegt, wo vo denn a noch ihm Karolinger heisst. D Besitz vo de Arnulfinger si um Metz und Verdun gläge gsi, die vo de Pippinide in den Ardenne, im Haspegau und in Toxandrie.

Dä Artikel basiert uff ere fräie Übersetzig vum Artikel „Arnulfinger“ vu de dütsche Wikipedia. E Liste vu de Autore un Versione isch do z finde.