Département Simplon

Us der alemannische Wikipedia, der freie Dialäkt-Enzyklopedy

S Departemänt vom Simplon isch es Verwaltigsgebiet vom erschte französische Kaiserrych gsi.

Wo dr Napoléon Bonaparte au d Schwiiz in sys Imperium ganz integriert het, isch s obere Rhonetaal uf em Gebiet vom Wallis als Departemänt organisiert worde. Dr französisch General César Berthier het uf Befääl vo Paris am 14. Nofämber 1810 z Sitte d Regierig übernoo. Am 16. Jänner 1811 isch dr französisch Prefäkt Claude-Joseph-Parfait Derville-Maléchard als Chef vo dr Departemäntsverwaltig ygsetzt worde, und ane 1813 isch als si Nochfolger dr Claude-Philibert Barthelot de Rambuteau is Wallis choo. Aber scho im Dezämber het er s Taal wider müesse verloo, wo e Deil vo dr öschtrychischi Armee am Ändi vom sächste Koalizionschrieg uf St-Maurice cho isch.

Dr Name vom Departemänt chunt vom Simplonpass, wo für d Franzoose als diräkte Wääg uf Italie wichtig gsi isch.

S Departemänt isch administratyv in drei Arrondissement underdeilt gsi und het 13 Kantöön gha:

  • s Arrondissement Brigue, mit de Kantöön Brigue, Conches, Mœrel, Rarogne und Viège
  • s Arrondissement Sion, mit de Kantöön Hérémence, Loèche, Sierre und Sion
  • s Arrondissement Saint-Maurice, mit de Kantöön Entremont, Martigny, Monthey und Saint-Maurice

Ane 1815 het der Wiener Kongräss d Empfäälig useggä, s Wallis chönt sech dr Schwiiz aschlüsse, und das hend d Walliser denn au gmacht.

Weblink[ändere | Quälltäxt bearbeite]