Conteur vaudois

Dr Conteur vaudois isch e wälschi Zytschrift us dr Schwiiz. Uf Tüütsch häisst dää Titel öppe «Wadtländer Gschichteverzeller».

Es isch d Zytschrift vo dr Wadtländer Mundartgselschaft Association vaudoise des amis du patois gsi.

Anne 1862 het se dr Waadtländer Louis Monnet (1831–1901) zäme mit em Henri Renou gründet. Es isch es Heft, wo all Wuchen äinisch use chunt, und es het drin Gschichten us em Wadtland, anderi Verzellige, Sache wo im Patois gschribe sind, Bytreeg zu Nöjikäite i dr Wirtschaft, Tegscht vo Wadtländer Dichter und Nöjikäite us dr ganze Wält. Für d Patois-Tegscht het psundersch dr Wadtländer Mundartdichter Louis Favrat (1827–1893) glueget, wo syni Sache vor allem im Conteur publiziert het.

Wo dr Monnet im Joor 1901 gstorben isch, hän dr Journalischt Julien Monnet, em Louis Monnet sy Soon, und em Louis Favrat si Soon Victor Favrat mit dr Redakzioon wytergmacht bis anne 1934. Zum iine z hälfe isch dr Veräin Société des amis du Conteur uf d Bäi gstellt woorde.

Die Heft sind e gueti Kwelle für d Wälschschwiizer Mundarte. Me het se au bi dr Redakzioon vom Wälschschwiizer Mundartwörterbuech Glossaire des patois de la Suisse romande chönne bruuche.

Mee weder zää Joor isch dr Conteur vaudois de nümmen usecho. Anne 1947 isch tank em Jean Bron und em Robert Molles dr Faade wider ufgnoo woorde mit dr nöie Sery Le nouveau Conteur vaudois. Spöter het d Zytschrift dr Naame Nouveau Conteur vaudois et romand übercho. Sit 1956 häisst er Conteur romand, revue pour le maintien des patois et des traditions. Nach em 1964i goot d Räie nume no unregelmässig wyter.

Dr Journalischt und Gschichtschryber Jean-Pierre Chuard (1928–1992) vo Lausanne het vom Conteur sinere Gschicht gschribe.

Literatur

• Jean-Pierre Chuard: Un journal unique en son genre. “Le conteur vaudois“.
• Jean-Pierre Chuard: Des journaux et des hommes. Aspects de l'histoire et de l'évolution de la presse en Suisse romande. Yens s. Morges 1993.
• Ernst Bollinger: Conteur vaudois In: Historisches Lexikon vo dr Schwiiz.