Charles III. (Verainigts Chenigrych)

Us der alemannische Wikipedia, der freie Dialäkt-Enzyklopedy
Dr Charles III., wu er no Prince of Wales gsi isch (2021)

Dr Charles III. (* 14. Novämber 1948 im Buckingham Palace, London, as Charles Philip Arthur George; dytsch Karl III.) isch syt em 8. Septämber 2022 Chenig vum Verainigte Chenigrych Großbritannie un Nordirland un vu 14 andere, Commonwealth Realm gnännte souveräne Staate mit ire Territorie un abhängige Biet. Dodriber uuse isch er Oberhaupt vum Commonwealth of Nations, wu 56 Staate umfasst, Läächeherr vu dr britische Chronbsitzige un wältlig Oberhaupt vu dr anglikanische Staatschilche. Gchrent woren isch er am 6. Mai 2023 in dr Westminster Abbey.

Vor syre Bstygig vum Droon isch dr Charles as eltschte Suhn vu dr Chenigi Elisabeth II. un vum Prinz Philip syt 1952 Duke of Cornwall un Duke of Rothesay gsii. Syt em Dood vu sym Vater 2021 isch er au Duke of Edinburgh gsii. Dr dradizionäll Titel vum britische Droonfolger, Prince of Wales, het er 1958 kriegt, di fyrlig Inveschtitur isch aber erscht am 1. Juli 1969 z Caernarfon Castle gsii. Är het d Wird vun eme Firscht vu Wales lenger wie alli syni Vorgänger ghaa un isch bi syre Droonbstygig mit 73 Johr elter wie ne jede britische Monarch vor ihm gsii.

Am 29. Juli 1981 het dr Charles d Lady Diana Spencer ghyrote. Us dären Eh sin zwee Sihn chuu: d Brinze William (* 1982) un Harry (* 1984). 1996 hän si si aber schaide loo. In zwoter Eh isch dr Charles syt em 10. Februar 2005 mit syre Jugedfryndin Camilla Parker-Bowles ghyrote, wu, syt är Chenig isch, dr Titel Queen Consort drait.

Dr Charles III. stammt iber sy Mueter us em Huus Sachsen-Coburg un Gotha, wu si 1917 in Windsor umgnännt het.[1] Au vu dr Vatersyte här ghere syni Vorfahre zue dytsche Adelsdinaschtie, dr Hyser Schleswig-Holstein-Sonderburg-Glücksburg (wo z Dänemark herrsche) un Battenberg (e hessische Sytezwyyg), anglisiert Mountbatten.

Literatur[ändere | Quälltäxt bearbeite]

  • Catherine Mayer: Charles. Mit dem Herzen eines Königs. Die Biografie. Wilhelm Heyne, München 2015, ISBN 978-3-453-20097-5. (Di änglisch Originalusgob isch 2015 usechu bi WH Allen z London, ISBN 978-0-7535-5593-4.)
  • Gothaisches Genealogisches Handbuch (GGH 13) – Fürstliche Häuser, Band 3. Usegee vum Dytsche Adelsarchiv. Marburg 2021, ISBN 978-3-9820762-2-5, S. 141–142.

Weblink[ändere | Quälltäxt bearbeite]

 Commons: Charles, Prince of Wales – Sammlig vo Multimediadateie

Fueßnote[ändere | Quälltäxt bearbeite]

  1. The Royal Family name. In: www.royal.uk. Abgruefen am 20. April 2021 (änglisch).


Vorgänger Amt Nochfolger
Elisabeth II. Chenig vum Verainigte Chenigrych un dr Commonwealth Realms
syt 2022