Westminster Abbey

Us der alemannische Wikipedia, der freie Dialäkt-Enzyklopedy
D Westminster Abbey z London

D Westminster Abbey isch ä Chille z London. Si schdoht grad im Weschde vom änglische Parlamäntsgebäud. Si isch dr Ort, wo d König und Königinne vom Vereinigte Königriich krönt wärde.

D Westminster Abbey ghört zsämme mit em Parlamämtsgebäud und dr St. Margaret Chille zum Wältkulturerb vo dr UNESCO.

Gschicht[ändere | Quälltäxt bearbeite]

Am Ort, wo hüt d Kathedrale stoht, het s zerschd ä Chloschder gha. Am Ändi vom 8. Johrhundert het ä chliini Gmeind vo Mönch uf dr Insle in dr Themse gläbt und 960 het dr St. Dunstan s Chloschder vergrösseret. Dr Eduard der Bekenner het ä neuji romanischi Chille in Chrüzform lo baue, wo 1065 iigweiht worden isch. Weniger as zwei Johrhundert spöter het dr Heinrich III. 1245 s meischde vo dr Chille usser em Schiff lo abriisse und die gothischi Abtei Chille im französische Schdiil lo baue. S Schiff het mä am Ändi vom 14. Johrhundert afo umbaue und dr Heinrich VII. het non ä neuji Kapelle drzue do. Die weschdlige Dürm si 1745 ferdig baut worde. D Chille isch im Zweite Wältchrieg beschädiget, aber noch em Chrieg gschnäll widr reschdauriert worde.

Bedütig[ändere | Quälltäxt bearbeite]

Sit em William em Eroberer si alli änglische Monarche in dr Westminster Abbey gchrönt worde, usser em Eduard V. und em Eduard VIII., wo nid gchrönt worde si. Bis zum Georg II. het me vili vo de Königinne und de König in dr Nöchi vom Grab vom Eduard em Bekenner in dr Chille beärdiget. Anderi berüehmti Änglander si au do biigsetzt worde: D Physiker Isaac Newton und Ernest Rutherford, dr Entdecker David Livingstone, dr Naturforscher Charles Darwin, d Dichder Geoffrey Chaucer, John Dryden, Rober Browing und vili anderi meh. In dr Nöchi vom Weschddoor isch s Grab vom Unbekannte Soldat uus em Erschde Wältchrieg.

Quelle[ändere | Quälltäxt bearbeite]

  • Dr Ardikel Westminster Abbey in dr Encyclopædia Britannica. Ultimate Reference Suite. Chicago: Encyclopædia Britannica, 2008.
  • Dr Ardikel Westminster Abbey in dr Microsoft® Encarta® Encyclopedia 99. © 1993–1998 Microsoft Corporation.

Literatur[ändere | Quälltäxt bearbeite]

  • Richard Jenkyns: Westminster Abbey. Cambridge, Mass. 2005, ISBN 0-674-01716-1 .
  • Tim Tatton-Brown (Hrsg.): Westminster Abbey. The Lady Chapel of Henry VII. Rochester, NY 2003, ISBN 1-84383-037-X.
  • Anthony E. Harvey: The funeral effigies of Westminster Abbey. Woodbridge u. a. 2003, ISBN 0-85115-879-X.
  • A bibliography of Westminster Abbey. A guide to the literature of Westminster Abbey, Westminster School and St. Margaret’s Church published between 1571 and 2000 compiled by Tony Trowles. Woodbridge u. a. 2005, ISBN 1-84383-154-6.

Koordinate: 51° 29′ 58″ N, 0° 7′ 39″ W