Bundesverein

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen

Bundesverein isch dr Begriff gsi, wo me 1813 für d Vereinigung vo de Schwiizer Kantön bruucht het. Er hät dr Eidgenössisch Bund sölle ablöse, wo sich uf d Mediationsverfassig gstützt het. Dr Begriff wird au für d Ziit vo 1813 bis 1815 in dr Schwiizer Gschicht bruucht.

Gschicht[ändere | Quälltäxt bearbeite]

Wo d Druppe vo dr antifranzösische Koalition in d Schwiiz iimarschiert si, het d Mediationsverfassig, wo de Schwiizer vom Napoleon Bonaparte mehr oder weniger ufzwunge worden isch, rasch an Understützig verlore. Abgsandti vo zäh vo de alte Kantön, Uri, Schwyz, Luzärn, Züri, Glarus, Zug, Freiburg, Basel, Schaffhuuse und beidi Appezäll — die neue Kantön, wo früehner Underdanegebiet gsi si, si nit iiglade gsi — hai sich zun ere eidgenössische Versammlig 1813 z Züri droffe und am 19. Dezämber d Ufhebig vo dr Mediationsakte und d Stifdig vom ene neue Bundesverein beschlosse,[1] churz nochdäm Bärn vo sich us scho am 22. Dezämber d Mediationsverfassig ufghobe het.[2]

In dr neue Bundesversammlig isch d Regierigsform, wie si vor dr Revolution gherrscht het aber ohni d Underdaneverheltnis, as neui Regierigsform vorgschlage worde. Nüün vo de alte und fümf neui Kantön si däm Bund bidrätte. Im Februar 1814 hai d Verhandlige über d Grundlinie von ere Bundesverfassig agfange, wo dr Mediationsverfassig nit unähnlig gsi isch und wo d Gliichheit vo alle Kantön festgleit het. D Kompetänze vom Bund si no chliiner gsi as in dr Mediation, dr Boste vom Landamma vo dr Schwiiz isch ufge worde und Sonderbünd si nit ungsetzlig gsi.[3]

Lueg au[ändere | Quälltäxt bearbeite]

D Restauration in dr Schwiiz

Nowiis[ändere | Quälltäxt bearbeite]

  1. Aufhebung der Mediationsakte in der Eidgenossenschaft und Stiftung eines neuen Bundes. Zürich 29. Dezember 1813
  2. Stiftung des Neuen Bundes (1813)
  3. Renato Morosoli: Bundesvertrag. In: Historisches Lexikon vo dr Schwiiz.