Bockstächerhoof

47.5620972222227.5851527777778

Dr Bockstächerhoof am Dootedanz 17

Dialäkt: Baseldütsch

Dr Bockstächerhoof isch e historischs Huus am Dootedanz 17 im Baasler Vorstedtkwardier. Er zellt as äis vo de Baasler Kulturgüeter.

Gschicht

Im Juni 1273 het dr Beck Kuno vom Ridder Heinrich Zerkinde e Liigeschaft überchoo, wo uf em Areal vom spöötere Bockstächerhoof glääge isch. 1285 isch säll Huus an s Breedigerklooster nääbe dra gange. Im Joor 1362 wird s as "das Hus und das Gesesse, das da stosset an den Prediger Kilchhof ze einer Siten und zu der anderen Siten an die Gassen den man nennet die Lottergasse" beschriibe, d Lottergass häisst hüte Spiddaalgass. 1509 het dr Schaffner vom Breedigerkloster festgstellt, ass s Huus im ene schlächte Zuestand sig.

Im Joor 1598 isch dr Jakob Battier dr Bsitzer gsi und 1610 wird zum erste Mol dr Naame "Bockstächer Hoof" erwäänt. Mä cha dä Naame mit käm Familienaame in Beziejig bringe. Es weer aber mööglig, ass denn e Bockstächer, d. h. e Dierkastrierer im Huus gwoont het. 1733 het dr Duechfabrikant Emanuel Ryhiner d Liigeschaft kauft und s Huus isch woorschinlig denn im Stil vom Barock umbaut worde. Im Joor 1844 het mä d Liigeschaft mit iirem zwäistöckige Barockflüügel zum Dootedanz aane, em Stallgeböid und dr Remise uf 32'000 Franke geschetzt. Si isch 1981 umfassend umbaut worde.

Bis 2014 isch s Institut Hyperwerk, en internazional vernetzts Institut an dr Hochschuel für Gstaltig und Kunst vo dr Fachhoochschuel Nordwestschwiz, am Bockstächerhoof dehäi gsi, bis es uf e nöi HGK Campus uf em Dreispitz züüglet isch.

Kwelle

• Bockstecherhof Geschichte, abgrüeft am 16. Novämber 2014