Dr Bockechrieg

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen
Bockechrieg
Bruppacher Horgen.jpg
Horge 1794 uf eme Stich vom Heinrich Brupbacher, s Zentrum vom Ufstand
Datum 24. März 1804–3. April 1804
Ort Um Horge
Usgang Zerst e milidärische Siig vo de Ufständische bim «Wirtshuus zur Bocke», denn hai eidgenössischi Druppe bi Affoltere dr Ufstand niidergschlage
Folge Politischi Niiderlag, Bsetzig vom ufständische Kantondeil am 3. April
Konfliktparteie
Coat of arms of Switzerland.svg Schwiizerischi Eidgenosseschaft

Wappen Stadt Züri
Wappen Bärn
Wappen Aargau

Wappen Landschaft Züri
Befählshaber
Oberst Jakob Christoph Ziegler

Landammann Niklaus Rudolf vo Wattewyl

Hans Jakob Willi

Jakob Schneebeli
Heinrich Häberling
Jakob Kleinert

Truppesterki
ca. 1000 ca. 600

Dr Bockechrieg isch e Bürgerchrieg gsi, wo 1804 in dr Schwiiz in dr Gegend vo Horge stattgfunde het. Er isch zwüsche dr ufständische Landbevölkerig und eidgenössische Druppe under dr Füehrig vo dr Stadt Züri usdrait worde.

Dr geschichtlig Hintergrund[ändere | Quälltäxt bearbeite]

D Landbevölkerig het vo Alters här de geistlige Grundherre e zähnte Deil vom landwirtschaftlige Erdrag müesse abliifere. Dä Zähnt isch agluegt worde as e unabdingbari Schuld vom Bode an Gott und isch für en Underhalt vo dr priesterlige Chille und vo de Chlöster iigsetzt worde, wo im Gegezug drfür vor Gott für s Volk iidräte si. Dr Zähnt vo Horge isch an s Chloster Fraumünster z Züri gange.

D Reformation het d Sälbstverantwortlichkeit vom Einzelne vor Gott und d Ufhebig vo de Chlöster im Kanton Züri brocht. Dr Zähnt het dur das si eigetligi Berächtigung verlore, aber er isch under em Reformator Ulrich Zwingli nit ufghobe worde, und isch em wältlige Fraumünsteramt und eso dr Stadtkasse zuegflosse. Die Stüür, wo d Stadtbevölkerig nit zahlt het, het bi vile Usenandersetzige zwüsche Stadt und Landschaft für Zündstoff gsorgt, so im Stäfner Handel 1794/95.

D Usgangssituation[ändere | Quälltäxt bearbeite]

In dr Helvetik het d Stadt Züri ihri beherrschendi Rolle über d Landschaft um d Stadt wiitgehend verlore, in dr Mediationsziit het si ihri Asprüch aber wider welle duresetze. Si het under anderem e Huldigungseid uf die neui kantonali Verfassig und uf d Obrigkeit verlangt. In 47 vo 192 Gmeinde isch das verweigeret worde, und es isch zu Gwaltdate cho.

Dr Verlauf[ändere | Quälltäxt bearbeite]

E Brandaschlag uf s Vogteischloss Wädeswil am 24. Merz 1804 isch die ersti Chriegshandlig vo de Ufständische gsi. Am 26. Merz hai sich öbbe 500 Ma gsammlet, wo mit eme Zug uf Zürich d Rücknahm vo de neue Gsetz het welle erreiche. Dr Schuester Hans Jakob Willi us Horge isch dr Afüehrer gsi und het si Hauptquartier in dr Tanne bi Schönebärg ufgschlage.

Am 28. Merz het dr Oberst Ziegler 1000 Ma Regierigsdruppe und drei stadteigeni Chriegsschiff vo dr Stadt Züri us gege d Landschäftler gfüehrt und het dr Dorfchärn vo Horge vom See us beschosse.

Noch Gfächt bi Oberriede, Wädeswil und in dr Hanegg hai sich d Druppe under em Ziegler zum Wirtshuus zur Bocke zruggzooge. D Rebelle hai s Wirtshuus gstürmt, wobii dr Willi verletzt worden isch und dr Kampf het müesse ufge. D Regierigsdruppe hai verlore und hai sich uf Züri zruggzooge.

Die Ufständische hai die abziehende Druppe nit verfolgt und dr Ufstand isch denn sehr schnäll zsämmebroche. Dr Niklaus Rudolf vo Wattewyl, dr Landamma vo dr Schwiiz, het Bärner und Aargauer Druppe afo mobilisiere no bevor en offiziells Hilfsgsuech us Züri idroffen isch, het dr Ufstand z Affoltere am Albis broche und am 3. April dr ufständisch Kantonsdeil bsetzt, entwaffnet und e Kontribution iidriibe.

D Chriegsfolge[ändere | Quälltäxt bearbeite]

D Landbevölkerig het zwar dr milidärisch Siig über d Regierigsdruppe gfiirt, het aber kei politische Nutze drus chönne zieh. Wo denn d Eidgenosseschaft sich iigmischt het, isch alles schnäll verbii gsi, und d Afüehrer vom Ufstand si verhafdet worde. Nochdäm en eidgenössischs Chriegsgricht dr Willi, dr Jakob Schneebeli und dr Heinrich Häberling, verurdeilt het, si die z Züri higrichtet worde. Vili anderi si zu Haft- und andere Strofe verurdeilt worde.[1] D Stadt het denn d Landbevölkerig zwunge, sich vo dr Zähntepflicht loszchaufe. Bi däm Loschauf het si sehr hochi Summe verlangt.

Gedänke[ändere | Quälltäxt bearbeite]

1876 het me e Märtyrerdänkmol am Bahnhofplatz vo Affoltere ufgstellt zum Gedänke an die, wo hiigrichdet worde si.

Literatur[ändere | Quälltäxt bearbeite]

  • Aemtlerverein (Hrsg.): Betrachtungen über den sogen[annten] Bockenkrieg in Zürich 1804 : zum Andenken an die als Märtyrer gefallenen Schneebeli, Häberling, Willi und Kleinert Genossenschafts-Buchdruckerei, Zürich, 1875.
  • Hans R. Fuhrer u. a.: Der Bockenkrieg 1804. Aufstand des Zürcher Landvolkes. (= Militärgeschichte zum Anfassen, 17). Militärakademie an der ETH Zürich, 2004.
  • Rolf Graber: „Jezt seye es einmal Zeit, die Freyheit und Gleichheit zu erfechten und den lezten Blutstropfen für dieselbe sprüzen zu lassen“. Zur „sozialen Logik“ des Volksaufstandes von 1804 auf der Zürcher Landschaft, in: Schweizerische Zeitschrift für Geschichte, Band 54/2004 (Digitalisat)
  • Albert Hauser: Der Bockenkrieg ein Aufstand des Zürcher Landvolkes im Jahre 1804. Diss. Zürich 1938
  • Joseph Jung (Hrsg.): Der Bockenkrieg 1804. Aspekte eines Volksaufstands. Verlag Neue Zürcher Zeitung, Zürich 2004, ISBN 3-03823-103-7
  • Paul Kläui: Geschichte der Gemeinde Horgen. Horgen 1952
  • Johann Jakob Leuthy: Vollständige Geschichte von dem Bocken-Krieg Anno 1804 : nach authentischen Quellen bearb. und versehen mit biographischen Notizen der Häupter dieses Aufstandes…; ein Beitrag zu des Schweizerlandes Geschichten für das Schweizervolk. Zürich, 1838 (Digitalisat)
  • J. J. Schneebeli: Der Bockenkrieg 1804. Stäfa 1904

Weblingg[ändere | Quälltäxt bearbeite]

 Commons: Bockenkrieg – Sammlig vo Multimediadateie

Nowiis[ändere | Quälltäxt bearbeite]

  1. Johann Jakob Leuthy, Vollständige geschichte von dem Bocken-krieg anno 1804: Nach authentischen quellen bearb. und versehen mit biographischen notizen der Häupter dieses Aufstandes Willi, Häberling, Schneebeli, Kleinert, Schoch, Grob Hanhart, Syz und Hauser, J.J. Leuthy, 1838
Information icon.svg Dä Artikel basiert uff ere fräie Übersetzig vu dere Version vum Artikel „Bockenkrieg“ vu de dütsche Wikipedia.

E Liste vu de Autore un Versione isch do z finde.