Bianca Mayer
D Bianca Mayer (* 17. Mai 1979 z Scuol) isch e Schwyzer rätoromanischi Musikeri un Sängeri, wu mer unter ihrem Chinschtlername Bibi Vaplan chännt.
Lääbe[ändere | Quälltäxt bearbeite]
D Bianca Mayer isch z Scuol im Engadin ufgwachse. Ihre Vater Reto Mayer isch Volksmusiker gsii.[1] No d Schuel het si an dr Musikhochschuel Züri (ZHdK) Klavier studiert un anne 2005 mit em Lehrdiplom abgschlosse.[2]
Scho im Studium het si fir Film un Theater kumpeniert (u. a. fir Vitus), gege Änd vum Studium het si sälber mit Unterrichte aagfange.
Anne 2009 het d Chinschtleri, wu in dr Zwischezyt scho ne braiteri Effetligkait gchännt het, dr Kulturfeerderbryys vum Kanton Graubünde gwunne.
Vu 2013 bis 2014 isch si Radiomoderatori bi Radiotelevisiun Svizra Rumantscha (RTR) gsii.[1]
Ihre eerscht greeßer CD-Projäkt «Alba da la Clozza» (2009) het in di romanisch Musik e neii, ganz aigeni Note broocht. Mit dr Albe «Ingio vasch» (alem. Wu goosch aane?), «Eu vegn cun tai» (alem. Ich chumm mit dir) un «Sdruogliar» (alem. Verwache) het si d Aigenart un Qualitet vu ihre Musik uf e nei, professionäll Level glupft. Ihri Ufdritt sin chraftvoll un voll vu Intimitet.[3]
Mit ihrem Duett mit em Carlos Leal «Vaplan», aber au mit Solo-Stuck wie «Lascha a Mai» isch d Bibi Vaplan reegelmääßig uf Radio SRF 3 z heere gsii.
Musik[ändere | Quälltäxt bearbeite]
Film- un Theatermusik[ändere | Quälltäxt bearbeite]
Syter anne 2003 schrybt d Bianca Mayer Kumpesizione fir Theaterstuck un Film, v u 2004 bis 2008 sin s zee Projäkt gsii. Si isch Kumpesizionsassischtänti unter anderem fir d Soundtrack vu dr Film Vitus (Fredi Murer, 2005), I was a Swiss Banker (Thomas Imbach, 2007) un Happy New Year (Christoph Schaub, 2008) gsii.[4]
Alba da la Clozza[ändere | Quälltäxt bearbeite]
Noch em Studium isch d Bianca Mayer bis 2009 Sängeri un Gitarrischti vu dr Rockband Alba da la Clozza gsii.[1]
Bibi Vaplan[ändere | Quälltäxt bearbeite]
Syter 2010 het d Bianca Mayer e ruehigere un bsinnligere Musikstil entwicklet.[5] Bibi, va plan! haißt in ihrem romanische Idiom Vallader Bianca, gang landsem! ud soll Programm syy. As Bibi Vaplan schrybt si d Täxt un d Musik, singt un spiilt Klavier oder au mol Cembalo.[1] S Album Sdruogiar (alem. Verwache) vu 2012 isch in Zämenaarbet mit dr Kammerphilharmonie Graubünden entstande.[5][6]
D Liedtäxt vu dr Bianca Mayer sin uf Vallader.[1] Iber s perseenli Motiv, Musik z mache, sait d Liedermacheri:
„La musica am güda da mütschir, d'incleger, sentir o da chattar darcheu il fuond suot ils peis cur ch'eu am perd aint in alch. Sch'eu füss cuntaintischma, nu stessa far musica, lura gessi a baiver ün caffe cun meis amis.“
„D Musik hilft mir uuszbräche, z verstoo, z fiele oder dr Boode unter dr Fieß wider finde, wänn i mi in irgendeebis verliere due. Wär i kumplett zfriide, mießt i kai Musik mache, no gieng i ender mit Frynd go Kaffee drinke.“
Diskografy[ändere | Quälltäxt bearbeite]
- Üna jada intuorn as Alba da la Clozza, 2009.
- Ingio vasch? as Bibi Vaplan, 2011.
- Eu vegn cun tai as Bibi Vaplan, 2011.
- Sdruogliar as Bibi Vaplan, 2012.
- Cul vent as Bibi Vaplan, 2015.
Bryys[ändere | Quälltäxt bearbeite]
- 2009: Feerfderbryys vum Kanton Graubünde.[4]
- 2014: Wäärchbyydraag vum Kanton Graubünde
- 2015: Wäärchbyydraag vum Kanton Graubünde.
Weblink[ändere | Quälltäxt bearbeite]
Fueßnote[ändere | Quälltäxt bearbeite]
- ↑ 1,0 1,1 1,2 1,3 1,4 Schweizer Radio und Fernsehen, Sendung Kulturplatz (Memento vom 11. Juni 2016 im Internet Archive) vum 17. Juli 2013, ufgruefen am 2. Septämber 2013.
- ↑ Biografie (Memento vom 12. Oktober 2013 im Internet Archive) auf mx3 (The Swiss Music Portal), ufgruefen am 2. Septämber 2013.
- ↑ Lyrikfestival Basel 2018
- ↑ 4,0 4,1 Radiotelevisiun Svizra Rumantscha: Sendung (Site cha nüme abgrüeft wärde; Suche im Webarchiv) von 2009, aufgerufen am 2. September 2013.
- ↑ 5,0 5,1 Engadiner Post (Memento vom 24. Juni 2016 im Internet Archive) vum 15. Novämber 2012, ufgruefen am 2. Septämber 2013.
- ↑ Biografischi Informatione (Memento vom 5. Oktober 2013 im Internet Archive) (PDF; 106 kB) bi dr romanische Jugedorganisation Giuventetgna Rumantscha, ufgruefen am 2. Septämber 2013.