Vishnu-devananda

De Swami Vishnu-devananda (* 31. Dezember 1927 z Kannimangalam, Kerala, Indie; † 9. November 1993 Mangaluru, Karnata, Indie) isch en Yogamaister und ghört zu de Pioniere vom Yoga im Weste. Er isch au underem Name „de flügedi Swami“ bikannt und isch e Schüeler vom Swami Sivananda gsii.

Chindhait und Sannyasin

De Vishnu-devananda isch am 31. Dezember 1927 as Soo vo riche Guetsbsitzer z Kannimangalam im südindische Staat Kerala uf d Welt choo. As junge Maa isch er i d Armee trete. E Flugblatt mit spirituelle Aalaitige vom Swami Sivananda, won er zuefällig gfunde het, het en biwoge wäred eme Urlaub uf Rishikesh z raise, um de Sivananda z treffe. Er het denn sini Militärlaufbaan ufgee und isch 1947 Sannyasin (Mönch) wore und denn en enge Schüeler vom Sivananda gsii. Er het ununderbroche Hatha-Yoga güebt und isch ann vo de gorosse Maister i dere Disziplin wore und isch de erst Yogalehrer i de Sivananda Yoga Vedanta Forest Academy z Rishikesh gsii.

Ane 1957 het en de Sivananda in Weste gschickt, um dai de Yoga zunderrichte. Er isch uf Kanada und het z Montreal s Sivananda Yoga Vedanta Centre ggründet. Im Verlauf vo de Ziit het er z Amerika, z Europa und z Indie meriri Yogazentre ggründet. De Vishnu-devananda isch wäred ere Pilgerrais för de Weltfride am 9. November 1993 i de Chüstestadt Mangaluru (Karnata, Indie) gstorbe.

Im 10. Dezember 2019 hett d Julie Salter, wo de Vishnu-devananda i de letschte Lebesjoore pflegt ghaa hett, uf Facebook de Vishnu-devananda bischuldigt, ass er si emotionaal missbruucht und sexuell belästigt heb. D Verhandlige mit de Sivananda Organisation hend zo kannere Ainigung gfüert und d Organisation hett d Undersuechige im Aprile 2020 wege de Corona-Pandemii abbroche. Vili eemooligi Schüeller vom Vishnu-devanande hend sich mittlerwiile vonem distanziert.

Fridesmissione

De Vishnu-devananda het sich aktiv för de Weltfride iigsetzt und isch immer wider miteme Flugi öber Chriegszone gfloge. 1971 isch er mitem Schauspiller Peter Sellers uf Belfast gfloge und e paar Mönet spööter öber de Suez-Kanal. Er het Blueme und Flugblätter mit Fridesbotschafte abgworfe. Debi het er ununderbroche s Mantra: „Om Namo Narayanaya“ gsunge. Sini Botsdchaft isch gsii: „De Mensch isch frai wiene Vogel. Öberwindet d Grenze mit Blueme und Liebi, nöd mit Gweer und Bombe!“ 1983 isch er öber d Berliner Muur gfloge und z Ostberlin glandet. Nocheme churze Verhör isch er frai gloo wore und zrugg uf West-Berlin gschickt wore. 1984 isch er undem Motto „Yoga för de Fride“ miteme Bus dör Indie graist, demit d Mensche vo sinere Haimet mite moderne Form vom Yoga vertraut werdet.

Werch uf Tüütsch

Swami Vishnu-devananda: Das große illustrierte Yoga -Buch; Aurum-Verlag 2007. ISBN 978-3-89901-183-8
Swami Vishnu-devananda: Meditation und Mantras; Reith 1997. ISBN 3-930716-02-X

Büecher

Gopala Krishna: The Yogi – Portraits of Swami Vishnudevananda; Yes International publishers. ISBN 0-936663-12-X

Link