Aristodemos

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen

De Aristodemos (altgriechἈριστόδημος) isch vo 732 bis 724 v.Chr. de König vo Messenie gsii und stammt usem Gschlecht vo de Aipytide. Er isch de Noofolger vom König Euphaes und de Vorgänger vom Damis.

Lebe[ändere | Quälltäxt bearbeite]

Wo de messenischi König Euphaes im Erst Messenische Chrieg bifole hett, di uugschützte Chliistädt vo Messenie z verloo, demit sich d Messenier am Berg Ithome asidle tüend, het en Orakel verlangt, as e Jungfrau usem Geschlecht vo de Aipytide a de Götter gopferet were söll. Debii isch s Loos uf d Töchter vom Lykiskos gfale. De hett sich aber mit dere usem Staub gmacht und isch uf Sparta gfloche. Do hett de Aristodemos fraiwilig sini Töchter abotte. Doch de Verlobti vo dere isch degege gsii und gsait, as er si gschwängeret heb und si gär ka Jungfrau mee sai. Innere Wüeti het de Aristodemos a sinnere Töchter de Buuch uufgschlitzt und wo d Messenier gsie hend, as si doch no e Jungfrau gsii isch, hend si gmaint, as dodemit s Orakel erfüllt sai.

Nochem Joor 732 v. Chr. isch de Euphaes ooni e männliche Throonfolger im Champf gege d Spartaner gfale und de Aristodemos isch zo sim Noofolger gwäält wore, obwoll di beede Woorseger Epebolos und Ophioneus degege gsii sind, well de sini Töchter töödt ghaa hett. De isch erfolgriich gsii im Chrieg gege d Spartaner und het ene ane 732 v. Chr. a de Ithome e schweeri Niderlaag bibroocht.

Ane 724 v. Chr. het en Orakel gsait, as Messenie kümpftig a dene ghööre söli, wo zerst em Zeus Ithomatas hundert Draifüess opferid. Well s Hailigtum innerhalb vo de Muure vo de Stadt a de Ithome glegen isch, hend sich d Messenier sicher gfüelt. De Spartaner Oibalos aber hett hundert Draifüess uus Toon gmacht und die i d Stadt gschmugglet und em Zeus gopferet. Wo d Messenier da gmerkt hend und well no anderi Vorzaiche schlechts verhaisse hend, isch ne de Muet abhande cho. Zo alem ane isch em Aristodemos im Tromm sini Töchter erschine, mitem uufgschlitzte Buuch. Si hett em sini Waffe ewegg gnoo, dodeför aber d Tooteinsignie vomene messenische Adlige öbergee. Druf aber hett sich de Aristodemos am Grab vo sinnere Töchter selber umbroocht. As sii Noofolger isch de Aipytid Damis gewäält wore.

D Historizität vo de literarisch uusgschmückte Ereignis werd vo de Forschig kritisch biwertet und d Jooresaagoobe bim Pausanias wered as faltsch aglueget, und söttet öppe 40 Joor spööter agesetzt were.[1]

Quellen[ändere | Quälltäxt bearbeite]

  • Pausanias, Raise z Griechenland 4,9-13.
  • Diodor, Griechischi Weltgschicht, Fragment 8,8.

Ainzelnoowiis[ändere | Quälltäxt bearbeite]

  1. Victor Parker: The Dates of the Messenian Wars; Chiron 21 (1991), 25-47.

Literatur[ändere | Quälltäxt bearbeite]

  • Mischa Meier: Aristodemos 4. In: Der Neue Pauly (DNP). Band 1, Metzler, Stuttgart 1996, ISBN 3-476-01471-1, Sp. 1107–1108.
  • Nino Luraghi: The Ancient Messenians: Constructions of Ethnicity and Memory. Cambridge University Press, Cambridge/ New York 2008, ISBN 978-0-521-85587-7. S. 97.