Aipytide

D Aipytide (altgriech. Αἰπυτίδαι) sind s Gschlecht vo de Könige vo Messenie gsii. Si hend sich as Noofaare vom Herakles aglueget. De Stammbomm und d Taate vo de Aipytide hett de Pausanias i sinnere Bischriibig vo Messenie öberliferet. Debii sind di erste Vertretter saagehaft, die spöötere mee oder weniger historisch.

Name

De Name hend d Aipytide vom Aipytos, em Soo vom Herakleid Kresphontes öberchoo. Sii Urgroossvatter uf de müetterliche Sitte isch de arkadischi König Aipytos.

Saagehafti Aipytide

• Aipytos, Soo vom Kresphontes und vo de Arkaderi Merope.
• Glaukos, Soo vom Aipytos.
• Isthmios, Soo vom Glaukos.
• Dotadas, Soo vom Isthmios.
• Sybotas, Soo vom Dotadas.

Aipytide i de Messenische Chrieg

D Historizitäät vo dene Aipytide isch i de Forschig umstritte. Daate vo de Liste sind die, wo de Pausanias agitt, noch de moderne Forschig müend die aber um rund vierzg Joor spööter agsetzt were.

• Phintas 2. Hälfti vom 9. Joorhundert v. Chr., Soo vom Sybotas
• Androkles, Soo vom Phintas, † 746 v. Chr.
• Antiochos, Soo vom Phintas, † 745 v. Chr.
• Euphaes, Soo vom Antiochos, 745-732 v. Chr.
• Lykiskos, um 740 v. Chr.
• Aristodemos, 732-724 v. Chr.
• Damis, 724 v. Chr.
• Aristomenes, messenische Fraihaitsheld
• Gorgos, Soo vom Aristomenes

Androkleide

D Noofaare vom Androkles, em Soo vom Phintas, sind oo Androkleide (altgriech. Ἀνδροκλείδαι) gnennt wore:

• Androkles, † 682 v. Chr.
• Phintas, † 682 v. Chr.

Quelle

• Pausanias: Raise z Griecheland 4.3 - 4.17