Arena von Lutetia

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen

Diä Arena von Lutetia (französisch Arènes de Lutèce), gilt als ältischts no erhaltnigs Bauwärch vo dä französischä Hauptschtadt Paris, wo i de antike Zyt Lutetia gheisse hät.

d Arena vo Lutetia

S römischi Amfitheatär befindet sich i dä Rue Monge, im 5. Arrondissement vo Paris.

D Arena schtammt us äm 1. Jahrhundärt und isch bis zum Ändi vom Jahrhundärt brucht wordä. Ungfähr 17'000 Persone händ chönnä dä Schpektakle (Theatervorschtelligä, aber au Kämpf uf Läbe und Tod) zueluege. Mit äm Ufchoo vom Chrischtetum händ diä römischä Zirküs allgemein a Bedütig verlore und wo im 3. bis 4. Jahrhundert d Hunnä in Europa iigfalle sind, isch d Arena vo Lutetia schtillgleit und ihri Schtei sind für dä Bau vo dä Schtadtmuure und anderä Feschtigsalage verwändet wordä.

D Ruinä sind erscht 1869 widerentdeckt wordä, wo diä Compagnie générale des omnibus a ihrer Schtell es Busdepot baue hät welle. Im Juli 1883 hät dä Victor Hugo im ene offenä Brief a dä Schtadtrat bäte, d Arena vo Lutetia under dä Schutz vo dä Schtadt z schtelle. Dä hät innerhalb vo wenige Täg reagiert und hät d Ruinä zum historische Monumänt erchlärt.

1916 isch s Busdepot abbroche und s Amphitheater i dä Folgi so wit als mögli reschtauriert worde. Hüt chönd det sogar d Käfig vo dä Löje besichtigt wärde.

48.8450592.352913Koordinate 48° 50′ 42″ N, 2° 21′ 10″ O