Andronikos III. (Byzanz)

Andronikos III. (Byzanz)
Kaiser vom Byzantinische Riich
Andronikos III. Palaiologos, Miniatur us em 14th. Joorhundert. Stuttgart, Württembergische Landesbibliothek.
Regierigsziit	1328 – 15. Juni 1341
Name	Andronikos III. Palaiologos Ανδρόνικος Γ' Παλαιολόγος
Uf d Wält cho	1296
Geburtsort	Konstantinopel
Gstorbe	15. Juni 1341 (im Alter vo 44)
Dodesort	Konstantinopel
Vorgänger	Andronikos II.
Nochfolger	Johannes V.
Verhürotet mit	Irene vo Braunschwäig Anna vo Savoye

Dr Andronikos III. Palaiologos (middelgriech. Ἀνδρόνικος Γ' ὁ Νέος Παλαιολόγος, * 1296 z Konstantinopel; † 15. Juni 1341 z Konstantinopel) isch vo 1328 bis zu sim Dood Kaiser vo Byzanz gsi. Er isch dr Soon vom Michael Palaiologos und dr chläiarmenische Brinzässin Rita (Maria) gsi, ere Dochder vom Levon II. Dr Andronikos isch dr Änkel und Noochfolger vom Kaiser Andronikos II. gsi.

Lääbe

Wil er so gwaltdäätig gsi isch, won er jung gsi isch, het en si Groossvater vo dr Droonfolg usgschlosse, wo si Vater 1320 gstorben isch. Dr Andronikos het sich ufgleent gege das und het Didymoticho as Basis gege Konstantinopel brucht. Noch eme Bürgerchrieg isch er 1325 zum Mitregänt vo sim Groossvater kröönt worde. Dr Friide zwüschene het nid lang ghebt und er het 1328 si Groossvater zwunge, abzdanke.

Im Andronikos si oberst Minister isch dr Johannes Kantakuzenos gsi, dr spööteri Kaiser Johannes VI. D Regierigszit vom Andronikos III. het dr Verfall vom Byzantinische Riich e Zitli lang ufghoobe. Er isch die ganz Zit in Chrieg verwigglet gsi, vor allem mit de Osmane, wo iir Gebiet vergröösseret häi und s byzantinische Chläiasie bis uf e Hampfle Enklave erooberet häi. 1332 het er d Schlacht vo Rusokastro gege dr bulgarisch Zar Iwan Alexander verloore, die letschti groossi Schlacht in de Byzantinisch-Bulgarische Chrieg. Dr Andronikos het bis 1337 e groosse Däil vo Thessalie und Epirus anekdiert, wo vo de Latiiner beherrscht worde si. Die Gebiet si aber scho 1348 an d Serbe under em Stephan Duschan verloore gange. Dr Andronikos het d Flotte nöi organisiert und d Insle Chios, Samos 1329 und Lesbos 1336 vo Genua zruggerooberet.

Er het dr Füerer vo de Hesychaste won e Form vo Spiritualitäät in dr orthodoxe Chille verdräte häi, dr Gregorios Palamas, gege d Aagriff vom Barlaam vo Kalabrie understützt. Dä isch denn schliesslig 1341 uf ere Sünoode verurdäilt worde, wo dr Andronikos dr Vorsitz ghaa het. Er het s aber nid fertig brocht, dr Staatshushalt z saniere und es isch em au nid glunge d Korrupzioon und dr Ämterchauf mit eme nöije oberste Grichtshoof iizdämme.

Dr Andronikos isch mit dr Adelheid-Irene vo Braunschweig-Grubehage (1293–1324) verhürootet gsi. Noch iirem Dood het er d Anna vo Savoye ghürootet. Die het denn, wo dr Andronikos gstorbe isch, für dr Droonerb Johannes V., wo denn erst achti gsi isch, gregiert. Im Andronikos si Dochder Asporça Hatun isch näbe dr Nilüfer (Nenuphar) und dr Teodora äini vo de Fraue vom osmanische Sultan Orhan Gazi gsi.

Litratuur

• Günter Weiß: A. III. Palaiologos. In: Lexikon des Mittelalters. Bd. 1, 2002, Sp. 614.

Vorgänger Andronikos II.

Kaiser vo Byzanz 1328–1341

Nochfolger Johannes V.

Dä Artikel basiert uff ere fräie Übersetzig vu dere Version vum Artikel „Andronikos_III._(Byzanz)“ vu de dütsche Wikipedia. E Liste vu de Autore un Versione isch do z finde.