Andrea Zamometić
Dr Andrea Zamometić (* um 1420 z Nin, hüt z Kroazie; † 13. Novämber 1484 z Baasel) isch dr Erzbischof vo Krajina gsi, wo 1482 z Baasel zum ene Kiirchekonziil ufgrüeft het, was as Kritik am Babst Sixtus IV. verstande worden isch. Er isch schliesslig uf Befääl vom Käiser Friedrich III. vom Baasler Root verhafdet und im Spaaleschwibbooge iigspert worde und het dört Sälbstmord begange.
D Zamometić-Affääre
[ändere | Quälltäxt bearbeite]Dr Zamometić isch emol dr Erzbischof vo Krajina gsi und scho lenger e Kritiker vom Babst Sixtus IV. Am 25. Merz 1482 het er im Baasler Münster sich für e Konziil stark gmacht, was em Babst überhaupt nid gfalle het. Dä het vo de Baasler verlangt, ass si dr Zamometić wurde festnee und an iin usliifere. Am 1. Mai 1482 het dr Root aber beschlosse, dr ufrüererisch Erzbischof z schütze und iim sichers Gläit z verspräche.
Dr Sixtus het denn im Septämber s Interdikt über Baasel verhängt und im Novämber druf d Stadt exkommuniziert und im Dezämber in ere Bulle zum Chrüzzuug gege sä ghetzt. Wenn am Aafang vo dr Affääre dr Zamometić no Understützer gha het, si die immer weeniger worde. Sogar dr Käiser Friedrich III. het im Oktober de Baasler nume no aagwiise, nüt gege dr Babstkritiker z undernää ooni si Befääl. Im Dezämber denn isch die käiserlig Verfüegig aachoo, ass dr Zamometić söll verhafdet würde. Dr Baasler Root het zwäi Sitzige brucht und schliesslig beschlosse, dr Zamometić iizspere. Am 21. Dezämber 1482 häi en Stadtchnächt zum Spaalenschwibbooge brocht, wo as Gfängnis brucht worde isch, und in Fessle gläit.
Dr Käiser und dr Babst häi 1883 abgmacht, ass dr Zamometić z Baasel söll bestrooft wärde und dr Räst vo sim Lääbe as Gfangnige im Eeseldurm wurd lääbe. Aber no bevor er verurdäilt worde isch, het sich dr Andrea Zamometić am 13. Novämber 1484 in sinere Zälle im Schwibbooge ufghänggt.
As Sälbstmörder het en d Kiirche nid christlig welle begraabe und mä het si Liiche in Rhii gheit.
Liddratuur
[ändere | Quälltäxt bearbeite]- Peter Habicht/Christoph Matt: Das Spalentor und die Vorstadt, Basel 2015.
- Rudolf Wackernagel: Geschichte der Stadt Basel, Basel 1907–1924.